लकडाउन थप १५ दिन बढाउने सरकारको तयारी

काठमाडौं,बैशाख २२- सरकारले थप १५ दिन लकडाउन (बन्दाबन्दी) थप्ने तयारी गरेको छ। कोरोना भाइरस संक्रमणको जोखिम उच्च रहेको भन्दै सरकारले जेठ १० गते सम्मका लागि लकडाउन थप गर्ने तयारी गरेको हो ।

आइतबार बसेको मन्त्रिपरिषद्को बैठकले पछिल्लो समय नेपालमा संक्रमणको दर बढ्दैं गएको र छिमेकी मुलुक भारतमा पनि संक्रमण दर बढिरहेकाले जोखिम कायमै रहेको निष्कर्ष निकाल्दैं लकडाउन थप १५ दिन बढाउनुपर्ने विषयमा छलफल गरिएको थियो।

• 

नेपालमा हिजो मात्र एकैदिन १६ जनामा कोरोना संक्रमण पुष्टि भएसँगै कोरोनाको उच्च जोखिम नेपालमा कायम रहेको छ । भारत र नेपालको खुला सिमानाका कारण पनि लकडाउन हटाउँदा स्थिति जुनसुकै बेला पनि भयावह हुनसक्ने भन्दै जेठ १० गतेसम्म बढाउने सहमति भएको स्रोतले बताए ।

हिजो मात्र नेपालगञ्जमा एकै टोलका १५ जनासहित १६ जनामा कोरोना संक्रमण पुष्ठि भएको छ भने अहिले त्यस क्षेत्र सिल गरिएको छ ।नेपालमा आजसम्म ७५ जना कोरोना संक्रमणको पुष्टि भएको छ ।