लगानी प्रस्ताव पेस गर्न समय थप

काठमाण्डौँ — लगानी सम्मेलनमा सोकेस गरिएका ५० आयोजनामा लगानीका लागि प्रस्ताव पेस गर्ने म्याद थप गरिएको छ ।

सम्मेलनमा प्रस्तुत गरिएकामध्ये ३३ आयोजनामा मात्रै लगानीका लागि प्रस्ताव पेस भएको लगानी बोर्ड स्रोतले जानकारी दिएको छ ।

प्रधानमन्त्री केपी शर्मा ओलीको अध्यक्षतामा बिहीबार बसेको बोर्डको बैठकले आयोजनामा लगानी गर्न थप एक महिना म्याद दिने निर्णय गरेको हो ।

चैत १५ र १६ गते काठमाडौंमा भएको लगानी सम्मेलनलाई आयोजनामा लगानीको प्रस्ताव पेस गर्ने म्याद भोलि शनिबारसम्मका लागि दिइएको थियो ।

अब लगानीकर्ताले आयोजनाका लागि मे २० तारिखसम्म प्रस्ताव पेस गर्न सक्नेछन् ।

सम्मेलनमा पेस गरिएका सबै आयोजनामा प्रस्ताव नपरेपछि म्याद थप गरिएको बोर्ड स्रोतले जानकारी दियो ।

बैठकले लगानी सम्मेलनको क्रममा परेका प्रस्तावहरूको मूल्यांकनको अनुगमन गर्न प्रधानमन्त्री कार्यालयका सचिवको नेतृत्वमा ५ सदस्यीय समिति गठन गर्ने निर्णय गरेको छ ।

— कान्तिपुर