विद्यालयमा तास खेलिरहेको अवस्थामा प्रधानध्यापक नै समातिए

काठमाडौं, भदौ १२ – विद्यालयमा तास खेलेको आरोपमा प्रहरीले प्रधानाध्यापकसहित ११ जनालाई पक्राउ गरेको छ । उनीहरुको साथबाट ४५ हजार ६४० रुपैयाँ बरामद भएको चितवन प्रहरीले शुक्रबार निकालेको सूचनामा उल्लेख छ ।

खैरहनीको इलाका प्रहरी कार्यालयले बिहीबार दिउँसो १ बजे खैरहनी नगरपालिका–२ को लिटिल हेभन स्कुलबाट उनीहरुलाई नियन्त्रणमा लिएको हो । स्कुलमै जुवा खेल्दै गरेको भन्ने सूचनाका आधारमा उनीहरुलाई नियन्त्रणमा लिइएको प्रहरीले बताएको छ ।

पक्राउ पर्नेहरुमा विद्यालयका प्रधानाध्यापक खैरहनी–२ का विष्णु सिलवालसहित सोही ठाउँका राजकुमार गुरुङ, ऋषिजन केसी, उमेश केसी, गुणराज केसी, तिलक श्रेष्ठ, राजु थापा, राम थापा, शिव सिलवाल, बलराम सिलवाल र बेनी केसी रहेका छन् ।