वीर अस्पतालमा १८ शैय्याको आईसीयू वार्ड र नयाँ भवनमा अक्सिजन प्लान्ट स्थापना गर्दै चौधरी फाउण्डेशन

काठमाडौं, जेठ २ । अक्सिजन अभाव भएपछि ५०० शैय्या क्षमता भएको वीर अस्पतालको नयाँ भवन सञ्चालनमा आउन नसकिरहेको बेलामा चौधरी फाउण्डेशनले उक्त भवनमा अक्सिजन प्लान्ट स्थापना गर्ने भएको छ । कोरोना भाइरसका संक्रमितका लागि अक्सिजनसहितको शैय्या आवश्यक परिरहेको भए पनि अक्सिजनको अभावमा उक्त भवनको संरचना प्रयोगमा ल्याउन सकिएको छैन ।

यही समस्यालाई सम्बोधन गर्दै चौधरी ग्रुपले वीर अस्पतालमा १८ शैय्याको अत्याधुनिक आईसीयू वार्ड र वीरकै नयाँ भवनमा अक्सिजन प्लान्ट स्थापना गर्न लागेको हो । यससम्बन्धी सहमतिमा एक–दुई दिनभित्रै चिकित्साशास्त्र अध्ययन प्रतिष्ठान (नाम्स) र चौधरी फाउन्डेसनबीच हस्ताक्षर हुने बताइएको छ ।

त्यसैगरी फाउण्डेशनले सुदूरपश्चिम प्रदेशको धनगढी नगरपालिका र कर्णाली प्रदेशको राजधानी रहेको सुर्खेत नगरपालिकामा एक–एक वटा अक्सिजन प्लान्ट स्थापना गर्ने छ । यस सम्बन्धमा पनि दुवै नगरपालिकासँग आवश्यक सहमति भइसकेको बताइएको छ ।

वीर अस्पताल, धनगढी र सुर्खेतमा स्थापना गरिने अक्सिजन प्लान्टको क्षमता ५० क्युबिक लिटर प्रतिघण्टा रहने छ । यसअनुसार एकदिनमा ४० लिटर क्षमताका १५० सिलिन्डर अक्सिजन भर्न सकिने छ ।

कोभिड–१९ को दोस्रो लहरका कारण नेपालमा उत्पन्न स्वास्थ्य संकटमा प्रभावकारी योगदान पुर्याउन चौधरी फाउन्डेशनले नेपालको स्वास्थ्य प्रणालीमा दीर्घकालीन महत्व राख्ने केही परियोजनामा काम गर्ने निर्णय गरेको बताएको छ ।

उक्त निर्णय तत्काल कार्यान्वयनमा ल्याउने अन्तिम तयारीमा रहेको फाउन्डेसनले अक्सिजन प्लान्टका लागि आवश्यक पर्ने सामग्री आयात गर्न आफ्नो टीम खटिएको बताउँदै संस्थाले आफ्नो विज्ञप्तिमा भनेको छ, ‘हामीलाई विश्वास छ कि हामी केही दिनभित्रै सामग्री आयात गरी प्लान्ट निर्माण गर्न र वीर अस्पतालका साथै कर्णाली र सुदूरपश्चिममा हाल विद्यमान अक्सिजन अभावको समस्या समाधान गर्न सफल हुनेछौं । धनगढी र सुर्खेतमा स्थापना हुने अक्सिजन प्लान्टले दुवै प्रदेशको अक्सिजन माग पूरा गर्ने छन् ।’

यसका साथै चौधरी फाउन्डेसन तत्काल अक्सिजन कन्टन्ट्रेसन आयात गरी अक्सिजनको चर्को अभाव खेपिरहेका अस्पताललाई उपलब्ध गराउन प्रतिबद्ध रहेको जानकारी गराएको छ । यी कन्सन्ट्रेसन काठमाडौं र बाहिरका अस्पतालमा वितरण गरिने छन् । आपतकालीन स्वास्थ्य व्यवस्थापनका लागि करिब १० करोड रुपैयाँ खर्च हुने अनुमान गरिएको छ ।

चौधरी फाउन्डेशनका अध्यक्ष एवं प्रतिनिधिसभा सदस्य विनोद चौधरीले कोरोना महामारीले देशभरका नागरिकलाई आक्रान्त बनाएको र यसको नियन्त्रणका लागि आपतकालीन स्वास्थ्य व्यवस्थापन अत्यन्तै जरुरी देखिएकाले फाउन्डेशनले एकीकृत योजना अगाडि सारेको बताएका छन् ।

‘अहिलेको मुख्य समस्या चिन्ताजनक अवस्थामा पुगेका बिरामीको जीवन रक्षा गर्नु हो । यसका लागि आईसीयू वार्ड, अक्सिजन प्लान्ट, अक्सिजन कन्सन्ट्रेटर सबैभन्दा महत्वपूर्ण स्वास्थ्य उपकरण हुन्,’ उनले भने, ‘हाम्रो अहिलेको सम्पूर्ण ध्यान कोरोनाका बिरामीको उपचारमा लगाउनुपर्छ । हामी यही उद्देश्यका साथ कोरोनाविरुद्धको अभियानमा अगाडि बढेका छौं ।’

चौधरी फाउन्डेसनले गत वर्ष कोरोना महामारीको पहिलो लहरका बेला आपतकालीन सहयोग कार्यक्रम अन्तर्गत देशभरका २ सयभन्दा बढी स्वास्थ्य केन्द्रमा पीपीई, स्यानिटाइजर, मास्क उपलब्ध गराएको थियो । साथै, देशका अस्पताललाई भेन्टिलेटरसहित आवश्यक स्वास्थ्य उपकरण उपलब्ध गराइएको थियो ।

फाउन्डेसनले केन्द्रीय प्रयोगशाला टेकु र धुलिखेल अस्पतालका लागि १ हजार थान पीसीआर रिएजेन्टसमेत उपलब्ध गराएको थियो । चौधरी ग्रुपले हरेक विपदमा जनताको साथमा रहेर उनीहरूको पीडामा साथ दिँदै आएको इतिहास छ । २०७२ सालको महाभूकम्पपश्चात् चौधरी फाउन्डेसन भूकम्पबाट घरबारविहीन बनेका २,५०० भन्दा बढी परिवारका लागि आवास र ५० भन्दा बढी विद्यालय निर्माणमा पनि सहभागी बनेको थियो ।