शेयर बजारमा सुधारको संकेत

काठमाडौं । निरन्तर ओरालो लाग्दै आएको शेयर बजार  पछिल्ला दुई दिनदेखि उकालो लाग्न थालेको छ । नेप्से परिसूचक दुई दिनमा २०.१३ अंकले वृद्धि भएको छ ।  दशैंको पूर्वसन्ध्यामा शेयर बजार उकालो लाग्नुलाई लगानीकर्ताले शुभ संकेतको रुपमा लिएका छन् । दशैं खर्चका लागि बिक्री गर्नेले यसअघि नै बिक्री गरिसकेकाले पनि शेयर बजार उकालो लाग्न पुगेको कतिपय लगानीकर्ताको भनाइ छ ।  दशैंपछि धेरैजसो कम्पनले साधारणसभा गर्दै छन् । ती कम्पनीको लाभांश बुक गर्नका लागि लगानीकर्ताले शेयर खरिद गर्न थालेकाले पनि बजार बढ्न पुगेको बिज्ञहरुको भनाइ छ ।

जेहोस, शेयर बजारमा सुधारको संकेत देखिएको छ । शेयर बजार निरन्तर ओरालो लाग्दा निराश बनेका लगानीकर्तामा बजार उकालो लाग्ने संकेत देखिएसँगै खुशी छाएको छ । लगानीकर्ताको मुहार पनि फेरिएको छ । हिजो एक ब्रोकरको कार्यालयमा पुग्दा हसिलो अनुहारमा लगानीकर्ता देखिएका थिए । बजार उकालो लाग्दै गएपछि लगानीकर्ताको चहल पहल बढने र ओरालो लाग्दा ब्रोकरका कार्यालय पनि सुनसान हुने गर्दछन् ।

सोमबार बजार बढ्न पुगेका कारण ब्रोकरको कार्यालयमा मंगलबार लगानीकर्ताको भिडभाड देखिन्थ्यो । लगानीकर्ताले दशैंको शुभकामना साटासाट गर्दै समृद्धिको कामना गरेका थिए । एक अर्काबीच मजाक गर्दै दशैंमा बुढापाकाले दिने आर्शीवाद समेत दिँदै थिए । दशैअघिको शेयर बजारमा आएको सुधारले खुशीयाली छाएको छ । तर, यो खुशीयाली कति दिनसम्म टिक्ने हो त्यो भने भनिहाल्न सक्ने अवस्था छैन ।

दशैंको मुखमा शेयर बिक्री गरेर खर्चको जोहो गर्न थालेपछि नेप्से ओरालो लाग्न पुगेको थियो । त्यसको प्रभाव सकिएसँगै शेयर बजार उकालो लाग्ने संकेत देखिएको छ ।

ब्रोकरले शेयर धितोमा राखेर ऋण दिन शुरु गरेका छन् ।  सहज रुपमा कर्जा पाइने भएकाले पनि शेयर बजारमा बृद्धि देखिएको ब्रोकरको भनाइ छ । यसका साथै कात्तिकको पहिलो सातादेखि नै बैंक तथा वित्तीय संस्थाको चालू आर्थिक वर्षको पहिलो त्रैमासिक वित्तीय विवरण आउनेछ । उनीहरुले सार्वजनिक गर्ने वित्तीय विवरणमा अधिकांश बैंक तथा वित्तीय संस्थाको नाफा उल्लेख रुपमा बढ्ने निश्चित छ । त्यसपछि शेयर बजार बढने अनुमान गरिएको छ ।

त्यसैगरी, दशैंको खर्चले बैंकिड प्रणालीमा लगानीयोग्य रकम (तरलता) बढ्दै जाने छ । बैंकमा त्यस्तो रकम आएपछि सहज रुपमा कर्जाको पाउने अनुमान गरिएको छ । दशैपछि नयाँ कर्जा लिन थाल्ने र त्यस्तो रकम शेयर बजार आउने भएकाले पनि नेप्से उकालो लाग्ने अनुमान गरिएको छ ।

दशैंपछि शेयरको भाउ बढने अनुमान गरिएकाले लगानीकर्तामा खुशीयाली छाएको छ । दशैंअघि शेयर लगानीकर्ताका लागि दुःखका दिन भए पनि दशैंपछि सुखद् दिनको शुरुवात हुने अपेक्षा गर्न थालिएको छ । अहिले लुटिएको खुशी दशंैपछि अन्त्य हुने र लगानीकर्तामा खुशीयाली बहार आउने अनुमान गरिएको छ ।

दशैपछि लगानीकर्ताले शेयर बजारका लागि शुभ रहने अनुमान गरेका छन् । मंगलबार शेयर बजार मापक नेप्से बढेर ११४५.६९ अंक पुगेको छ । नेप्सेले यसअघि बनाएको नयाँ रेर्कड बनाएको १८८१ बिन्दुलाई पच्छाउँदै उकालो लाग्ने अनुमान पनि गर्न थालिएको छ।