सरकारले उखुको खुद्रा मूल्य निर्धारण , चिनी मुल्य कति हुन्छ ?

काठमाडौं – सरकारले उखुको खुद्रा मूल्य निर्धारण गरेको छ । मन्त्रिपरिषदको बैठकले प्रतिक्विन्टल ५ सय ३६ रुपैयाँ ५६ पैसा निर्धारण गरिएको सूचना तथा सञ्चारमन्त्री एवम् सरकारका प्रवक्ता गोकुल बास्कोटाले जानकारी दिएका छन् ।

मन्त्रिपरिषदको निर्णय सार्वजनिक गर्दै सञ्चारमन्त्री बास्कोटाले उखु उत्पादक कृषकले सीधै भुक्तानी पाउने गरी उखु कृषकलाई अनुदान दिनेसम्बन्धी कार्यविधि, २०७५ बमोजिम प्रतिक्विन्टल ६५ रुपैयाँ २८ पैसा अनुदान उपलब्ध गराउन अर्थमन्त्रालयले कृषि तथा पशुपक्षी विकास मन्त्रालयलाई रकम निकासा गरिने जानकारी दिए ।

चिनी मिलहरुले सम्बन्धित उखु कृषकलाई प्रतिक्विन्टल ४ सय ७१ रुपैयाँ २८ पैसामा नघटाई समयमै भुक्तानी गर्न सरकारले उद्योगीहरुलाई निर्देशन दिएको छ ।
तर उद्योगीहरु सरकारले तोकेको मुल्य अनुसार आफुहरुले उद्योग सञ्चालन गर्न नसक्ने जनाएका छन् । चिनी उद्योगी शशिकान्त अग्रवालले सरकारले निर्धारण गरेको उखुको मुल्य अनुसार बजार मुल्य ९० पर्ने बताएका छन् ।

उनले किसानलाई प्रतिकेजी उखुको मुल्य ५६ रुपैयाँ पर्न आउने त्यसमा १ केजी चिनी उत्पादन गर्दा १२ रुपैयाँ लाग्ने ६ रुपैयाँ नाफा राखी १३ प्रतिशत भ्याट जोडेर ढुवानी खर्च सहित ढुवानी मुल्य जोड्दा ९० रुपैयाँ बजार भाउ हुने बताएका छन् ।

सरकारले भने सबै जोड्दा ७० रुपैयाँ बजार भाउ हुने बताएको छ ।