सरकारले विश्वासको मत लिन आवश्यक नरहेको परराष्ट्रमन्त्रीको दाबी

काठमाडौँ, २३ चैत – परराष्ट्रमन्त्री प्रदीप ज्ञवालीले केपी शर्मा ओली नेतृत्वको सरकारले विश्वासको मत लिनु नपर्ने बताएका छन् । 

सोमबार प्रतिनिधिसभामा सांसदहरुको प्रश्नको जवाफ दिँदै मन्त्री ज्ञवालीले माओवादी केन्द्रको समर्थन कायमै रहेकाले विश्वासको मत लिनु आवश्यक नरहेको दाबी गरेका हुन् ।  

सर्वोच्च अदालतको फागुन २३ गतेको फैसलापछि नेकपा विभाजित भएको भन्दै प्रतिनिधिसभाको बैठकमा सांसदहरुले सरकारले विश्वासको मत लिनुपर्ने धारणा राखेका थिए ।

त्यसको जवाफमा मन्त्री ज्ञवालीले सरकार संविधानअनुसार नै चलेको बताउँदै अहिले विश्वासको मत लिन जरुरी नरहेको बताएका हुन् । 

मन्त्री ज्ञवालीले दार्चुलाको सिमाना रहेको महाकाली नदीमा भारतले बनाइरहेको बाँधका सम्बन्धमा भारतलाई सरकारले ध्यानाकर्षण गराएको बताए । 

एक सातापछि भारत र नेपाल दुवैको नापी विभागले तथ्यगत प्रमाण संकलन गर्ने उनले जानकारी दिए ।