सी डिभिजन लिगमा सामाजिक युवा क्लब र मनाेहरा युनाइटेड विजयी

काठमाण्डाै, चैत ६ – सहिद स्मारक सी डिभिजन लिग फुटबलमा शुक्रवार भएको खेलमा सामाजिक युवा क्लब र मनोहरा युनाइटेड क्लब विजयी भएका छन् ।

ललितपुरको सातदोबाटोमा रहेको एन्फा मैदानमा भएको खेलमा सानेपा युथ क्लबलाई एक–शून्यले हराएर सामाजिक युवा क्लबले लगातार दोस्रो जित निकालेको हो । सामाजिक युवा क्लबका विकास दर्जीले खेलको ८४ औँ मिनेटमा गरेको गोल नै निर्णायक भयो । पहिलो खेलमा सामाजिक युवा क्लबले स्वयम्भू क्लबलाई हराएको थियो ।

यस्तै एन्फा मैदानमै भएको दोस्रो खेलमा मनोहरा युनाइटेडले सानो गौचरण युथ क्लबलाई तीन–एकले हराएको छ । मनोहराले पनि दोस्रो जित निकालेको छ । मनोहराका अञ्जन लिम्बुले ह्याट्रिक गरे । आकाश श्रेष्ठले गरेको गोलबाट सुरुवाती अग्रता लिए पनि सानो गौचरण पराजित भयो ।