हेटौडामा कोरोनाको परिक्षण शुरु गरिदै

दिपक पराजुली

हेटौडा,चैत्र २०- प्रदेश सरकारको पहलमा आजबाट हेटौडाको किटजन्य रोग अनुसन्धान तथा तालिम केन्द्रको ल्याबबाट नै कोरोनाको परिक्षण शुरु गर्ने तयारी पुरा भएको छ।

ल्याबका लागि चाहिने सबै उपकरण जडान भैसकेको र जनशक्ति पनि आइसकेकोले आज देखि परिक्षण शुरु हुने बागमती प्रदेशका मुख्यमन्त्री डोरमणि पौडेलले जानकारी दिए । ल्याबमा प्रत्येक दिन ७५ वटासम्म संकलित नमुना परिक्षण गर्न सकिनेछ।

छिमेकी रास्ट्र भारतसम्म कोरोना फैलिसकेको अवस्थामा सबैमा सचेत र सावधानी अपनाउन आग्रह गर्दै उनले कोरोना नियन्त्रणको लागि प्रदेश सरकारले सम्पूर्ण तयारी पुरा गरेको बताए। नेपाल सरकारको दुरदर्शी र प्रभावकारी कदमको कारण देशमा कोरोना भित्रिए पनि फैलिन नसकेको भन्दै उनले कोरोना संक्रमित पनि केहि दिनमा स्वास्थलाभ गरि फर्कनेमा बिश्वास व्यक्त गरे ।

कोरोना नेपालमा नफैलिनुलाई कसैको कृपा भनियो भने अहोरात्र खटिने नेपाली स्वास्थकर्मी, सुरक्षाकर्मी र विभिन्न निकायका सरकारी व्यक्तित्वको मुख्य भूमिका अवमुल्यन हुने मुख्यमन्त्रीको भनाइ छ। परिक्षणको लागि तयारी पुरा भएपनि अहिलेसम्म परिक्षणको लागि कुनै नमुना संकलन भै नआएको सामाजिक बिकास मन्त्रालयका सचिब दिपेन्द्र सुबेदीले बताए।