१२ केजी अफिमसहित २ जना पक्राउ

काठमाडौं, २१ कात्तिक – प्रहरीले १२ केजी अफिमसहित जाजरकोटका दुई जनालाई पक्राउ गरेको छ । रुकुम पश्चिमको आठबिसकोट नगरपालिका–९ राडीबजार निवासी धिरेन्द्र शाहको घरमा बस्ने जाजरकोट नलगाड नगरपालिका–८ का ४६ वर्षीय मालबहादुर सिंह र सोही नगरपालिकाको वडा नम्बर ९ बस्ने ६० वर्षीय कालीबहादुर सिंहलाई प्रहरीले अफिमसहित पक्राउ गरेको हो ।

प्रदेश कार्यालयबाट खटिएको प्रहरीको विशेष टोली, लागूऔषध टोली, जिल्ला प्रहरी कार्यालय रुकुम पश्चिम र इलाका प्रहरी कार्यालय आठबिसकोटबाट खटिएको प्रहरी टोलीले विशेष सुराकीका आधारमा धिरेन्द्र शाहको घरमा खानतलासी गर्दा अफिम फेला परेको हो । दुवै जनालाई प्रहरीले नियन्त्रणमा लिइ थप अनुसन्धान गरिरहेको जनाएको छ ।