६० दिनपछि १ महिलाको आँखामा पुन: कोरोना संक्रमण

काठमाडौं, असोज २६ –  चीनमा एक कोरोना मुक्त व्यक्तिमा निको भएको ६० दिनपछि कोरोना भाइरस फेला परेको छ । चिनियाँ सञ्चारमाध्यमका अनुसार ६५ वर्षीया चिनियाँ महिलामा कोरोना संक्रमण भएको ६० दिनपछि फेरि आँखामा संक्रमण पाइएको हो ।

अनौठो घटना सार्वजनिक भएपछि चिनियाँ वैज्ञानिकहरु अनुसन्धानमा जुटेका छन् । जनवरीमा कोरोना संक्रमण भएपछि ती महिलाले अस्पताल भर्ना भएर उपचार गराएकी थिइन् । चिकित्सकहरुले उनमा सामान्य ज्वरो र डायरियाबाहेक अन्य स्वास्थ्य समस्या नभएको हिस्ट्री भएको बताएका छन् ।

फोक्सोमा समस्या देखिए पनि उनको हिस्ट्रीमा आँखामा कुनै समस्या थिएन । एक महिनापछि रिपोर्ट नेगेटिभ आएपछि उनी डिस्चार्ज भएकी थिइन् । तर, डिस्चार्ज भएको ८ दिनपछि आँखामा समस्या देखिएको थियो ।

अप्रिलमा शल्यक्रिया गर्दाको स्वाबमा उनको आँखामा कोरोना संक्रमण पुष्टि भएको थियो । आप्थेल्मोलोजी जर्नलमा प्रकाशित यो रिपोर्ट अनुसार ती महिलामा ६० दिन भन्दा धेरै समयसम्म पनि कोरोना संक्रमण भएको पाइएको उल्लेख छ ।