३५ हजार रुपैयाँले शैलुन सुरु गरेका कुँवर दम्पती भन्छन् : आत्मसन्तुष्टिको कुरामा केही कमी छैन

काठमाडौं । गुल्मीको रेसुङ्गा नगरपालिका–२ का कुँवर दम्पतीले शैलुन व्यवसायबाटै मनग्ये आम्दानी गर्दै आएका छन् ।

इन्द्रबहादुर र मोनिका कुँवरले जिल्लाको सदरमुकाम तम्घासको क्याम्पसरोडमा एउटै छानामुनी मोनिका हेयर कटिङ एण्ड जेन्स पार्लर र मोनिका ब्युटिपार्लर सञ्चालन गरेका हुन् । आजभन्दा आठ वर्ष अगाडिबाट औपचारिकरुपमा दर्ता गरेर कुँवर दम्पतीले आ–आफ्नो सीप र दक्षता अनुसारको शैलुन व्यवसाय सुरु गरेका हुन्।

भारतमा कमाएर ल्याएको  ३५ हजार  रूपैयाँले लगानीमा व्यवासय सुरु गरेको इन्द्रबहादुरले बताए । रोजगारीको सिलसिलामा भारत जानुभएका कुँवर लामो समयसम्म भारतमै काम गरे ।जागिर गरेर मात्र सन्तुष्ट नभएपछि कुँवरले भारतमै शैलुनसम्बन्धीका विभिन्न तालिम लिए । त्यसपछि आफूले कमाएको थोरै रकमले भए पनि आफँै व्यवसाय सुरु गर्ने भन्दै जन्मथलोमा फर्किए ।

यसमा इन्द्रबहादुर मात्र होइन श्रीमती मोनिका पनि निरन्तरको सारथी बने । दुवैको सहमतिमा शैलुन व्यवसाय खोलेएका छन् । उमरेले ४७ वर्ष पुगेका  इन्द्रबहादुर आफूले सञ्चालन गरेको शैलुन व्यवसायबाट निकै सन्तुष्ट छौं ।

सुरुमा सानोबाट लगानी गरेर अहिले उनले व्यवसायलाई बढाउँदै लैजानुका साथै आम्दानीलाई विभिन्न ठाउँमा लगानी गरे । आर्थिक अभावका कारण अध्ययनमा केही समस्या भएका कारण भारत छिरेका इन्द्रबहादुरले अहिले आफ्नो सीपका कारण कुनै पछुतो मानेका छन्।“पढाइ, पैसा र कुनै सीप नहुँदा मलाई धेरै चिन्ता लाग्ने गर्दथ्यो” कपाल काट्दै इन्द्रबहादुरले भने “भारतमा सिकेको सीपले आत्मनिर्भर मात्र नभई स्वाभिमानी समेत बनायो ।” उनले कुनै न कुनै सीप हरेक व्यक्तिमा हुनुपर्ने र जसका कारण सजिलै आत्मनिर्भर बन्न सकिने बताए ।

आफूलाई सानैदेखि गाउँमा कपाल काट्नेमा निकै रुचि लाग्ने गरेको उनी समझन्छन् । आफ्नो रुचिलाई सीपमा बदल्दै आत्मनिर्भर गरेर मनग्ये आम्दानी गरिरहनुभएका इन्द्रबहादुर रोजगारभन्दा व्यवसायले सन्तुष्ट मिल्ने गरेको बताए । सामान्य जीविकोपार्जनको लागि पनि परिवारबाट टाढा गएर काम गर्नुपर्ने बाध्यता भएको समयमा आफूले सिकेको सीपका कारण जन्मथलोमै बसेर आम्दानी गरिरहेको उनले बताए ।

इन्द्रसँगै श्रीमती मोनिकाले सोही ठाउँमै मोनिका ब्युटिपार्लर चलाए । दुवैतर्फ सबै चाँजोपाँजो मिलाउने मोनिका पनि सीपले भरिपुर्ण छन् । दुवै जनाको मेहनत र निरन्तर कर्मका कारण अहिलेसँगै बसेर व्यवसाय सञ्चालन गरी मनग्ये आम्दानी गर्दा मोनिका पनि सन्तुष्ट छन्।

महिलाले नेतृत्व गरेर आफैँ खटिएर व्यवसाय सञ्चालन गर्दा सफल हुने भन्दै उनले बताए महिला र पुरुष बराबर भएकोले दुवैले बराबर मेहनत गर्नुपर्ने बताए ।

३५ हजार रुपैयाँबाट सुरु गरेको शैलुन व्यवसाय अहिले ३५ लाखभन्दा माथि पुगेको सञ्चालक इन्द्रबहादुरले बताए । पुरुष र महिला पार्लर दुवैमा गरेर   उनको भनाइ छ । “दुवैतर्फ गरेर औसतमा ६०/६० हजार बचत गर्न सकिएको छ”, उनी भन्छन्, “आत्मसन्तुष्टिको कुरामा केही कमी छैन, सीपले अवसर पाएको ठानेको छु ।” सो शैलुनमा सेवा लिने जो कोही पनि सन्तुष्ट भएर फर्किने गरेका छन् ।

कुँवर दम्पतीले शैलुन व्यवसायबाट पाँच जनालाई रोजगारी दिए । इन्द्रबहादुर स्थानीय पालिकाले दिने शैलुनका तालिममा पनि मुख्य प्रशिक्षक भएर पुगेका छन् । अहिलेसम्म एक सय ५० जनालाई सीप सिकाएको उनले बताए। इन्द्र बहादुर कुँवर नेपाल नाई संघ गुल्मीका उपाध्यक्ष समेत छन् । शैलुन व्यवसाय गर्नेहरु संस्थागत रुपमा एकताबद्ध भएर अगाडि बढ्नुपर्नेमा पनि उनको जोड छ ।