पछिल्लो २४ घण्टामा ५४२ जनामा कोरोना संक्रमण पुष्टि

काठमाडौं । नेपालमा पछिल्लो २४ घण्टामा थप ५ सय ४२ जनामा कोरोना भाइरसको संक्रमण पुष्टि भएको छ ।

बितेको २४ घण्टामा देशभर २ हजार ०८२ जनामा आरटी–पीसीआर गर्दा २ सय २४ जना र २ हजार ८४८ जनाको एन्टिजेन परीक्षण गर्दा ३ सय १८ जना गरी आज ५४२ जनामा संक्रमण पुष्टि भएको हो । नेपालमा पछिल्लो २४ घण्टामा कोरोना भाइरस संक्रमणका कारण कोहीको मृत्यु भएको भने छैन ।

पछिल्लो २४ घण्टामा ९ लाख ७६ हजार ५७ जनाले कोरोनाविरुद्धको खोप लगाएका छन् । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ४ सय २१ जना संक्रमणमुक्त भएका छन् । यो सँगै नेपालमा कोरोना भाइरसबाट संक्रमणमुक्त हुनेको संख्या ९ लाख ७७ हजार ३ सय ५८ जना पुगेको छ । यो कुल संक्रमितको ९८.२ प्रतिशत हो ।

हाल देशभर सक्रिय संक्रमितको संख्या ५ हजार २६५ जना रहेका छन् । मन्त्रालयका अनुसार हालसम्म नेपालमा कोही पनि क्वारेन्टिनमा छैनन् ।