उपत्यकामा हजार आइसोलेसन बेड तयारी अवस्थामा

काठमाडौं, चैत ५ – सरकारले कोरोना भाइरस संक्रमण (कोभिड–१९) को सम्भावित जोखिम कम गर्न काठमाडौं उपत्यकामा १ हजार आइसोलेसन बेड तयारी अवस्थामा राखेको छ । स्वास्थ्य तथा जनसंख्या मन्त्रालयका सचिव यादवप्रसाद कोइरालाले काठमाडौंका विभिन्न स्थानमा रहेका अस्पतालमा १ हजार आइसोलेसन बेड तयारी अवस्थामा राखिएको जानकारी दिए ।

सरकारले मंगलबार मात्रै काठमाडौं उपत्यकामा १ हजार आइसोलेसन बेड तयारी अवस्थामा राख्ने निर्णय गर्दै त्यसको आवश्यक चाँजोपाजो मिलाउने जिम्मेवारी स्वास्थ्य तथा जनसंख्या मन्त्रालयलाई दिएको थियो । सरकारको सो निर्णयअनुसार १ हजार आइसोलेसन बेड तयारी अवस्थामा राखिएको सचिव कोइरालाले बताए । सरकारले कोरोनाको सम्भावित जोखिम न्यूनीकरण गर्न उपत्यकामा १२० र उपत्यका बाहिर ११५ आईसीयू बेड स्थापना गर्ने निर्णय गरेको थियो ।

सचिव कोइरालाका अनुसार यदि संक्रमण फैलिहालेको अवस्थामा पहिलो चरणमा बढीमा १ हजार जना सम्म राख्न सक्नेगरी आइसोलेसन बेड बनाइएको छ । ‘यो एकैपटक फैलने होइन, व्यक्तिबाट फैलने दर अत्याधिक हुने भएकाले संक्रमण हुनेलाई आइसोलेसनमा राखेर उपचार गर्न सकिएमा थप संक्रमण हुनबाट बचाउन सकिन्छ, ’कोइरालाले भने ।

उनले रुघाखोकीले उच्च रूपमा सताइएका व्यक्ति आफंै सेल्फ क्वारेन्टाइनमा बस्नुपर्ने बताए । सरकारले पूर्णरूपमा तयारी गरेकाले सर्वसाधारणलाई नआत्तिन आग्रह गरेको छ । संक्रमण बढेमा कतिपय निजी अस्पतालका बेडलाई समेत प्रयोग गर्न सकिने गरी निजी अस्पतालका सञ्चालकसँग छलफल थालिएको सचिव कोइरालाले जानकारी दिए ।

यसैगरी, सरकारको भारतबाट नेपाल भित्रने विभिन्न नाकामा कडाइ गर्ने भएको छ । भारतबाट नेपाल भित्रने सबै नाकाबाट नेपाल भित्रनेहरूलाई कडा परीक्षण गरेर आउन दिने वा केही समयलाई प्रवेशमा पूर्ण रोक लगाउने भन्ने विषयमा मंगलबार सरकारी अधिकारीबीच उच्चस्तरमा छलफल भए पनि निर्णय भने हुन सकेको छैन । यसैगरी स्वास्थ्य तथा जनसंख्या मन्त्रालयले काठमाडौं उपत्यकाका सबै सरकारी र निजी अस्पतालमा रुघाखोकी र ज्वरोको समस्या लिएर जानेहरूको स्वास्थ्य परीक्षण गर्न समेत निर्देशन दिएको छ । आजको राजधानी दैनिकमा समाचार छ ।