चुनावको मुखमा खोटाङमा जसपा र एमालेका ४४ नेता तथा कार्यकर्ता माओवादीमा प्रवेश 

काठमाडौँ । चुनावको मुखमा खोटाङमा जनता समाजवादी पार्टी र नेकपा एमालेका ४४ नेता तथा कार्यकर्ता माओवादी केन्द्र प्रवेश गरेका छन् । जनता समाजवादीका ३८ जना र एमालेका छ जना नेता तथा कार्यकर्ता बिहीबार पत्रकार सम्मेलन गर्दै माओवादी केन्द्र प्रवेश गरेका हुन् । समाजवादी विद्यार्थी युनियनका केन्द्रीय सचिवालय सदस्य, १ नम्बर प्रदेश समिति अध्यक्ष तथा जसपा खोटाङका प्रचार विभाग प्रमुख रबिन खम्बुको नेतृत्वमा जसपाका विभिन्न जिम्मेवारीमा रहेका नेता तथा कार्यकर्ता माओवादी केन्द्र प्रवेश गरेका छन् ।

यस्तै, समाजवादी युवा सङ्घ खोटाङका अध्यक्ष एवं जसपाका पार्टी उत्पादन तथा स्वरोजगार विभाग प्रमुख गजेन्द्र राई, जसपाका सचिवालय सदस्य एवं दिप्रुङ चुईचुम्मा गाउँपालिका अध्यक्ष पृथ्वीकुमार राई, जिल्ला सचिवालय सदस्य मेघराज राई, प्रवास समिति कतारका उपाध्यक्ष गजेन्द्र खालिङ राई, दिक्तेल रुपाकोट मझुवागढी नगर समिति सह–सचिव सौराज राई, जसपा खोटाङ–काठमाडौँ सम्पर्क समितिका प्रज्वल राईलगायतका नेता तथा कार्यकर्ता माओवादी केन्द्र प्रवेश गरेका छन् ।

नेतृत्वले पार्टीलाई प्रतिक्रियावादी कित्तामा पुर्‍याउँदै प्रतिगमनका मतियार मानिएको एमाले र राप्रपा जस्ता यथास्थितिवादी दलसँग सहकार्य गरेकाले पार्टी परिवर्तन गरेको खम्बुले पत्रकार सम्मेलनमा बताए । ‘पार्टीको नीति, विचार र सिद्धान्त विपरीत नेतृत्वले मनोमानी निर्णय गर्दै सही दिशा दिन सकेन,’ खम्बुले भने, ‘सैद्धान्तिक वैचारिक पथमा विचलन आइ व्यक्तिवादी प्रवृत्ति हाबी भएको ठहर गर्दै हामीले पार्टी छाडेर माओवादी केन्द्रमा समाहित भएका हौँ ।’

एमाले जिल्ला कमिटी सदस्य जयप्रसाद (जेपी) आचार्य, दिक्तेल रुपाकोट मझुवागढी नगरपालिका–८ वडा कमिटी अध्यक्ष रबिन्द्रकुमार राई, वडा कमिटी सदस्य जीतबहादुर राई, दीपेन्द्र राई, नवराज भुजेल र समर्थक मणिराज राई पनि माओवादी केन्द्र प्रवेश गरेका छन् । जसपा र एमाले छाडेका नेता तथा कार्यकर्तालाई माओवादी केन्द्रका  पोलिटव्यूरो सदस्य, संविधानसभा सदस्यका उम्मेदवार एबं प्रदेश १ का खानेपानी, सिँचाई तथा ऊर्जा मन्त्री रामकुमार राई, पोलिटव्यूरो सदस्य समिता कार्की, वैकल्पिक केन्द्रीय सदस्य ध्रुव बुढाथोकी, प्रदेश कमिटी उपाध्यक्ष देवान किराती, जिल्ला संयोजक दीपक पाण्डे, प्रदेश कमिटी सदस्य टंक थापा, विनोद आचार्य, जीवन राई लगायतले पार्टीमा स्वागत गरेका थिए ।

जनता समाजवादी पार्टी खोटाङका तत्कालिन अध्यक्ष टंक थापा सहितका नेता माओवादी केन्द्र प्रवेश गरेको अढाई महिनापछि थप नेता तथा कार्यकर्ताले जसपा छाडेका हुन् । गत साउन ३० गते जसपा परित्यागको घोषणा गरेका ३९ नेता तथा कार्यकर्तामध्ये थापासहितका १३ जना भदौ १ गते माओवादी केन्द्र प्रवेश गरेका थिए ।