महिला चेम्बरको आर्थिक सहयोग र गृहणी संघको आयोजनामा एक दिने तालिम सम्पन्न

काठमाडौं- गृहणी महिला संघ नेपालको आयोजना तथा नेपाल महिला चेम्बरको आर्थिक सहयोगमा मैनबत्ती बनाउने एक दिने तालिम सम्पन्न भएको छ ।

गृहणी महिला संघ नेपालकी अध्यक्ष अमृता शर्माको अध्यक्षतामा आयोजित सो कार्यक्रम नेपाल महिला चेम्बरकी अध्यक्ष उर्मिला श्रेष्ठको प्रमुख आतिथ्यता, महिला चेम्वरकी महासचिव लिमा अधिकारीको बिशेष आतिथ्यता र नेपाल चेम्बर अफ कमर्शकी निर्देशक सृस्‍टि त्रिपाठीको आतिथ्यता माझ भएको थियो । तालिममा विभिन्न संस्था अन्तर्गत ८ वटा स्थानका कुल २८ जना दिदीबहिनीहरुको सहभागीता रहेको थियो । जसमा मुलपानी, जोरपाटी, माकलबारी, बुढानिलकण्ठबाट छिमेकी महिला समुह स्वरोजगार उद्यमशिल समुह कपन, आमा अभियान वानेश्वर साथै माइती नेपाल सम्बद्ध थिए ।

सो अवसरमा गृहणी महिला संघ नेपालकी अध्यक्ष अमृता शर्माले महिलाहरुलाई आत्मनिर्भर बनाउन उद्यमशिलता विकासको खाँचो रहेको औंल्याउदै आगामी दिनहरुमा समेत नेपाल महिला चेम्बरको सहयोगमा यस्ता शिपमुलक तालिमहरु संचालन गर्न संघ इच्छुक रहेको र त्यो आशा पुरा हुनेमा आफुहरु विश्वस्त रहेको बताइन् । प्रशिक्षण पस्चात प्रशिक्षकले झिलिमिली रहने चाड तिहारमा मैनबत्तीको खपत अधिक रहने हुँदा तालिमबाट सिकेको शिपलाई प्रयोगमा ल्याउदै आम्दानी गर्न सकिने जनाईन् । कार्यक्रमका वक्ताहरुले तालिमबाट प्राप्त शिपलाई रोजगारमुखी बनाउनुपर्नेमा जोड दिदै उत्पादित मैनबत्तीलाई प्रदर्शनीहरुमा राखी हौसला दिदै अघि बढने बढाउने कार्य जरुरी रहेको औंल्याएका थिए । तालिमका सहभागीहरुले धेरै लगानी गर्न नपर्ने, थोरै पुँजी लगानीबाट पनि व्यवसाय संचालन गर्न सकिने, घर धन्दा सकेर समय मिलाएर सजिलैसँग सिक्न सकिने र एकै दिनमा शिप हासिल गर्न सकिने भएकाले तालिमले आकर्षित तुल्याएको र तालिम प्रभावकारी रहेको बताएका थिए ।