भारतमा ओमिक्रोनबाट संक्रमित हुनेको संख्या २०० जना पुग्यो

नयाँ दिल्ली । छिमेकी मुलुक भारतमा कोरोना भाइरस (कोभिड–१९)को नयाँ भेरियन्ट ओमिक्रोनबाट संक्रमित हुनेको सङ्ख्या २०० जना पुगेको छ ।

सङ्क्रमितमध्ये ७७ जना विदेशबाट आएको त्यहाँको संघीय स्वास्थ्य मन्त्रालयले जनाएको छ । संक्रमितमध्ये महाराष्ट्र र दिल्लीमा सबैभन्दा धेरै अर्थात ५४ जना भेटिएका छन् ।

त्यस्तै, तेलंगना र कर्नाटकमा क्रमशः २० र १९ जना संक्रमित देखिएका छन् भने राजस्थानमा १८ जना संक्रमित भेटिएका छन् । त्यसैगरी, केरला र गुज्रातमा क्रमशः १५ र १४ जनामा ओमिक्रोन देखिएको मन्त्रालयले जनाएको छ ।

यसैबीच, भारतमा पछिल्लो २४ घन्टामा पाँच हजार ३२६ जनामा कोभिड संक्रमण भएको छ । त्यस्तै, पछिल्लो २४ घन्टामा ४५३ जनाको मृत्यु भएको छ ।

अहिलेसम्म भारतमा कोभिडबाट चार लाख ७८ हजारको मृत्यु भएको छ । भारतमा अझै पनि ७९ हजार सक्रिय संक्रमित छन् । यो अहिलेसम्मकै न्यून संख्या हो ।