आठबिसमा बहुमत वडासहित एमाले विजयी

काठमाडौँ– दैलेखको आठबिस नगरपालिकामा नेकपा एमाले विजयी भएको छ। नगर प्रमुख र उपप्रमुखमा बहुमत वडासहित एमालेले विजय हासिल गरेको हो। एमालेबाट प्रमुखमा तर्कबहादुर बडुवाल र उपप्रमुखमा कल्पना कुमारी थापा विजयी भएकी हुन्।

कांग्रेसका उम्मेदवार प्रेमप्रकाश शाहीलाई २६१ मतान्तरले हराउँदै बडुवाल विजयी भएको आठविस नगरपालिकाका निर्वाचन अधिकृत ओमबहादुर अधिकारीले जानकारी दिए । उनका अनुसार विजयी बडुवालले ५ हजार ३२७ मत ल्याएका छन् । पराजित शाहीले भने ५ हजार ६६ मत मात्रै पाए । यस्तै उपप्रमुखमा १४८ मतान्तरले एमालेकी कल्पना थापा विजयी भएकी छन् । कांग्रेसकी उम्मेदवार निशा थापाले ४ हजार ९६५ मत ल्याएर पराजित हुँदा थापाले ५ हजार ११३ मत ल्याएर विजयी भएको निर्वाचन अधिकृत अधिकारीले जनाए ।

साथै नेकपा एमालेबाट आठबिस नगरपालिकाको वडा नम्बर १ मा बमबहादुर रावत, २ मा कलम कामी, ४ मा टेकबहादुर माझी, ६ मा नवराज शर्मा र ८ मा अदल शाही विजयी भएका छन् । यस्तै, नेपाली कांग्रेसले ३ वडा जितेको छ । जसमा वडा नम्बर ३ मा नगेन्द्रराज कार्की, ५ मा बजर सिंह वि.क, ७ मा जैसिंह कठायत र ९ मा शेरबहादुर सिजापती विजयी भएका छन् ।