थप १०९० जनामा कोरोना संक्रमण पुष्टि, २ जनाको मृत्यु

काठमाडौं । नेपालमा पछिल्लो २४ घण्टामा थप १ हजार ०९० जनामा कोरोना भाइरसको संक्रमण पुष्टि भएको छ ।

बितेको २४ घण्टामा देशभर २ हजार ९५८ जनामा आरटी–पीसीआर गर्दा ५ सय ६० जना र ३ हजार ३४२ जनाको एन्टिजेन परीक्षण गर्दा ५ सय ३० जना गरी आज १०९० जनामा संक्रमण पुष्टि भएको हो ।

नेपालमा पछिल्लो २४ घण्टामा कोरोना भाइरस संक्रमणका कारण २ जनाको मृत्यु भएको छ । यो सँगै नेपालमा कोरोना भाइरसको संक्रमणका कारण ज्यान गुमाउनेको संख्या ११ हजार ९७४ जना पुगेको छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ४ सय ३८ जना संक्रमित निको भएका छन् । यो सँगै नेपालमा कोरोना भाइरसबाट संक्रमणमुक्त हुनेको संख्या ९ लाख ७३ हजार ४०५ जना पुगेको छ । यो कुल संक्रमितको ९८.२ प्रतिशत हो । नेपालमा पछिल्लो २४ घण्टामा १७१८३७ जनाले कोरोना विरुद्धको खोप लगाएका छन् ।

हाल देशभर सक्रिय संक्रमितको संख्या ५ हजार ८०६ जना छ । मन्त्रालयका अनुसार हालसम्म नेपालमा कोही पनि क्वारेन्टिनमा छैनन् ।