सवारी दुर्घटना : कारण भेटिन्छ, समाधान खोजिन्न

दुर्घटनाको कारण पत्ता लागे पनि सुधारको बाटो नअपनाइँदा सडकमा यात्रुलाई प्राथमिकतामा नराखिएको प्रस्ट हुने उनको भनाइ छ । दुर्घटना भएकामध्ये कम्तीमा १० प्रतिशतकै भए पनि अध्ययन गराउनुपर्ने उनको सुझाव छ । ‘सडकमा खटिएका प्रहरीले लेखेर पठाएका आधारमा दुर्घटना के कारणले भयो भन्ने थाहा हुने गरेको छ । सम्बन्धित यातायात कार्यालयमा रहेका इन्जिनियरमार्फत अध्ययन गराउन त सकिन्थ्यो, यति पनि भएन,’ पूर्वसचिव पौडेलले भने, ‘हरेक दुर्घटनामा चालकको लापरबाही भन्ने गरिन्छ । कतिपय सवारी ठीक अवस्थामा नभएर हुन्छ भने केहीमा सडकका कारण ।’ सवारी दुर्घटनामा विशिष्ट व्यक्ति परे मात्रै छानबिन हुनु उचित नरहेको उनले बताए । सवारी तथा यातायात व्यवस्था ऐनमा भएको व्यवस्था कार्यान्वयन नहुँदा दुर्घटना बढिरहेको ट्राफिक व्यवस्थापनका जानकार नेपाल प्रहरीका पूर्वएआईजी गणेशराज राईले बताए । ‘यातायात व्यवस्था विभागले आफू पनि गर्दैन, ट्राफिक प्रहरीलाई पनि अधिकार दिन्न । यसले पनि यातायात व्यवस्थापनमा समस्या देखिएको हो,’ उनले भने, ‘नियम उल्लंघन गर्नेलाई जरिवाना न्यून हुँदा पनि चालकको लापरबाही बढेको छ ।’