मोरङका १६९ वडामा मतदाता शिक्षा कार्यक्रम

काठमाडौँ । आसन्न प्रतिनिधिसभा तथा प्रदेशसभा निर्वाचनमा बदर मत न्यूनीकरण गर्न प्रदेश नं १ निर्वाचन कार्यालय विराटनगरले मतदाता शिक्षा अभियानलाई आजदेखि मोरङमा सुरु गरेको छ ।

निर्वाचन आयोग नेपालको मतदाता शिक्षा कार्यक्रम अभियानअन्तर्गत जिल्लाका १६ पालिकामा नमुना मतदान कार्यक्रम र १७ पालिकामा मतदाता शिक्षा कार्यक्रम सञ्चालन गरिएको कार्यालयका प्रमुख लेवनकश्यप अधिकारीले जानकारी दिए । विराटनगर महानगरपालिमा नमुना मतदान कार्यक्रम बुधवार सञ्चालन भइसकेको छ ।

गत स्थानीय तह निर्वाचनमा ठुलो मतपत्रमा मतदाता झुक्किने, एक पद निर्वाचित गर्नुपर्नेमा दुई जनालाई मतदान गर्ने जस्ता कार्यले बदर मत अत्यधिक भएको सन्दर्भमा सो कार्यलाई न्यूनीकरण गर्न नमुना मतदान र मतदाता शिक्षा प्रभावकारी हुने विश्वास कार्यालयको रहेको छ । नमुना मतदान कार्यक्रमअन्तर्गत आजदेखि सुन्दरहरैचा नगरपालिका, कटहरी गाउँपालिका, बुढीगङ्गा गाउँपालिका, ग्रामथान गाउँपालिका, धनपालथान गाउँपालिका र जहदा गाउँपालिकाको एक/एक स्थानमा मतदाता शिक्षा सञ्चालन गरिएको छ ।

नमुना मतदानमा मतदाताले प्रतिनिधिसभाको प्रत्यक्ष र समानुपातिकतर्फ दुई वटा मतपत्र, प्रदेशसभा सदस्य प्रत्यक्ष र समानुपातिक गरी दुई वटा मतपत्र गरी जम्मा चार वटा मतपत्रमा स्वस्तिक छाप लगाउनुपर्ने जानकारी दिइने कार्यालयका सूचना अधिकारी तीर्थराज अधिकारीले जानकारी दिए । कार्यालयले कात्तिक २० गतेसम्म दुई टोली खटाइ जिल्लाका पालिकाका छ स्थानमा दैनिक नमुना मतदान केन्द्र सञ्चालन गर्ने उनले बताए ।

कार्यालयले जिल्लाका १७ पालिकाको एक सय ६९ वडामा आजदेखि आगामी मङ्सिर १ गतेसम्म मतदाता शिक्षा कार्यक्रम सञ्चालन सुरु गरेको छ । वडाका महिला स्वास्थ्य स्वयंसेविकाले टोल, चोक र सामुदायिक विद्यालय एवं सार्वजनिक स्थानमा मतदातालाई मतदान गर्दा अपनाउनुपर्ने सावधानीका विषयमा जानकारी दिनेछन् । स्वयंसेविकाले मतदातालाई चार वटा मतपत्रमा एक÷एक जनप्रतिनिधि छान्न एक÷एक स्वस्तिक छाप लगाउने, चार वटा मतपेटिकामा मत खसाल्ने, मतपत्र पट्याउने तरिका, स्वस्तिक चिह्न लगाउने तरिका लगायतका विषयमा जानकारी दिनेछन् ।