मतगणना आजै रातिदेखि सुरु हुने

काठमाडौँ । निर्वाचन आयोगले आज रातिदेखि नै मतगणना सुरु हुने जनाएको छ । निर्वाचन आयोगमा आयोजित पत्रकार सम्मेलन मार्फत प्रमुख निर्वाचन आयुक्त दिनेशकुमार थपलियाले काठमाडौँ लगायतका केही सुगम जिल्लामा मतगणना सुरु हुने जानकारी दिए ।

उनका अनुसार ६१ प्रतिशत मतदान भएको छ । सबै प्रदेश र सबै ठाउँको मत खसेको विवरण नआइसकेका कारण केही प्रतिशत मत बढ्ने उनको भनाइ छ । आयोगले अपेक्षा गरेको भन्दा कम मत खसेको थपलियाको भनाइ छ ।

निर्वाचनका क्रममा सुर्खेत, नवलपरासी, गुल्मी र बाजुराका १५ स्थानमा मतदान स्थगन भएको छ । स्थगन भएको निर्वाचन क्षेत्रको २ दिनभित्र पुनः मतदान गराइसक्ने गरी निर्देशन दिएको थपलियाको भनाइ छ । देशभर केही सामान्य घटना बाहेक उत्सजनक सम्पन्न भएको आयोगले जनाएको छ ।

७ वटा अति विकट मतदान केन्द्रका मतपेटिका मौसमले साथ दिएमा भोलि बेलुकीसम्म निर्वाचन अधिकृतको कार्यालयमा ल्याइने र त्यसमा नेपाली सेनाको हेलिकोप्टर प्रयोग हुने थपलियाको भनाइ छ ।