साग महिला क्रिकेटमा अञ्जलीको विश्व कीर्तिमान

काठमाडौं,मंसिर १६- १३ औँ दक्षिण एसियाली खेलकुद (साग) को महिला क्रिकेटमा नेपालले माल्दिभ्समाथि १० विकेटको फराकिलो अन्तरले जित निकालेको छ । पोखरामा टस जितेर व्याटिङ थालेको माल्दिभ्सले १०.१ ओभरमा सबै विकेट गुमाएर मात्र १६ रन बनायो । १७ रनको लक्ष्य पाएको नेपालले ५ बलमा पूरा गर्‍यो ।

नेपालको जितमा बलर अञ्जली चन्दको कीर्तिमानी बलिङ गरिन् ।उनले माल्दिभ्सविरुद्ध एक रन पनि नदिइ ६ विकेट लिएर नयाँ कीर्तिमान बनाइन् । उनले पहिलो ओभर मेडन राख्दै तीन विकेट लिइन् । त्यस्तै दोस्रो ओभरमा पनि एक रन पनि खर्चिनन् । र तेस्रो ओभरमा थप एक विकेट लिइन् । जसका कारण उनले महिला क्रिकेटमा कीर्तिमानी फिगर बनाइन् ।

जम्मा २.१ ओभर बलिङ गरेकी उनले एक रन पनि दिइनन् र ६ विकेट लिइन् ।यसअघि कम रन दिएर धेरै विकेट लिने कीर्तिमान मलेसियाकी मास एलिसाको नाममा थियो । एलिसाले चीनविरुद्धको खेलमा ४ ओभरमा १ मेडन राख्दै ३ रन दिएर ६ विकेट लिएकी थिइन् ।