गाेरखा पुगेर सुरेन्द्र पाण्डेले भने- गण्डकी प्रदेश सरकारको नेतृत्व आलोपालो हुनसक्छ

मुख्यमन्त्री अधिकारलाई सुझाव : सरकार बसिरहनु उचित हुन्न, तत्काल राजीनामा दिनुस

गाेरखा । नेपाली कांग्रेस गण्डकी प्रदेशसभाका संसदीय दलका नेता सुरेन्द्रराज पाण्डेले गण्डकी प्रदेश सरकारको नेतृत्व आलोपालो हुनसक्ने बताएका छन् ।

कांग्रेस गोरखाले आज बिहान आयोजना गरेको पत्रकार भेटघाटमा बोल्दै उनले अन्य प्रदेशमा जस्तै गण्डकी प्रदेशमा पनि कांग्रेस र माओवादी केन्द्रले आलोपालो सरकारको नेतृत्व गर्न सक्ने बताएका हुन् ।

‘अहिले प्रदेश सरकारको नेतृत्व आलोपालो भन्ने कुरा आएको छ’, उनले भने, ‘गण्डकी प्रदेशमा मात्र होइन सातवटै प्रदेशमा आलोपालो सरकारको नेतृत्व हुनसक्छ ।’

कांग्रेसका तर्फबाट मुख्यमन्त्रीका दाबेदारसमेत रहेका नेता पाण्डेले प्रदेशको निर्वाचनको चुनाव लड्ने क्रममा नै आफूले मुख्यमन्त्रीका लागि गृहकार्य गरेको बताए।

‘प्रदेश सरकारको नेतृत्वको सन्र्दभमा सबै कुराको टुङ्गो प्रदेशमा पनि लाग्दैन’, उनले भने, ‘यी विषय शीर्ष नेताका बीचमा छलफल भएर केन्द्रीय तहमै टुङ्गो लाग्ने कुरा पनि हुन् ।’

एमालेको नेतृत्वमा रहेको प्रदेश सरकारलाई माओवादी केन्द्रले दिएको समर्थन फिर्ता लिएपछि प्रदेश सरकार अल्पमतमा रहेकाले मुख्यमन्त्री खगराज अधिकारी सरकार बसिरहनु उचित नहुने उनकाे तर्क थियाे ।

‘हामीले सरकार अल्पमतमा परिसक्यो, अल्पमतको सरकारमा बसिरहनु स्वाभिामान देखिँदैन भन्दा पनि उहाँ सरकारमा बसिरहनुभएको छ’, उनले भने, ‘अब बहुमत पाउने सम्भावना नभएकाले उचित निकास लागि दिनका लागि पनि सुझाव दिइसकेका छाैँ ।’