दक्षिण कोरिया जाने नेपाली कामदारलाई प्रिपेड सिमकार्ड वितरणका नाममा ठगी

काठमाडौं । दक्षिण कोरिया जाने नेपाली कामदारलाई प्रिपेड सिमकार्ड वितरणका नाममा ठगी भइरहेको पाइएको छ । ललिपुरमा रहेको ईपीएस कोरिया शाखाको कार्यालय परिसरमा दक्षिण कोरिया जाने नेपाली कामदारलाई अवैध रूपमा प्रिपेड सिमकार्ड वितरण भइरहेको पाइएको हो ।

सिमकार्ड निःशुल्क रूपमा वितरण भइरहे पनि त्यो कोरिया घुम्न गएका विदेशीले केही दिन प्रयोग गरेर छाडेको रहेको पाइएको छ ।

सिमकार्ड वितरण निःशुल्क वितरण गर्ने भनिए पनि रिचार्ज गर्ने नाममा प्रतिव्यक्ति तीन हजार रुपैयाँसम्म उठाउने गरेको पाइएको ईपीएस कोरिया शाखाका निर्देशक पुष्पराज कटुवालले बताए ।

अवैध रूपमा प्रिपेड सिमकार्ड वितरण भइरहेको पाइएपछि उक्त कार्य रोक्न नेपाल प्रहरी, वाणिज्य, आपूर्ति तथा उपभोक्ता संरक्षण विभागलगायत सम्बन्धित निकायलाई जानकारी गराइएको उनले बताए ।

अवैध रूपमा कोरियाको प्रिपेड सिमकार्ड बिक्री–वितरण भइरहेको गुनासो आएसँगै अनुगमन गरी कारबाही गर्न अनुरोध गर्दै गएको पुस ४ गते प्रहरी र सो विभागलाई पत्र लेखी पठाएको उनले जानकारी दिए । त्यसरी सिमकार्ड वितरण कार्य नरोकिएपछि पुनः वैशाख ३१ गते दोस्रोपटक प्रहरीलाई जानकारी गराइएको उनले बताए ।

ईपीएस कोरिया शाखाका निर्देशक कटुवालले कार्यलय परिसरवरपर बिमा, फोटोकपी, प्रिन्टिङलगायत कार्य बजार मूल्यभन्दा चर्को शुल्क लिई ठगी गर्ने गरिएको पनि बताए । यस्ता ठगी कार्य तत्काल रोक्न सम्बन्धित निकायलाई अनुरोध गरिएको उनले जानकारी दिए ।

यस्ता ठगीबारे सम्बन्धित निकायलाई ताकेता गरेको करिब पाँच महिना पुग्न लाग्दा समेत समस्या समाधान नभएको उनले गुनासो गरे । हालसम्म प्रहरी र वाणिज्य आपूर्ति तथा उपभोक्ता संरक्षण विभाग अनुगमन समेत गर्न नआएको उनले बताए ।