वर्षा र हिमपातका कारण आन्तरिक उडान प्रभावित

काठमाडौं, पुस २४ – मंगलबारदेखि सुरु भएको पश्चिमी वायुको प्रभावले देशभरिकै मौसम बदली भएको छ । देशभर आज वर्षा र हिमपात भइरहेका कारण आन्तरिक उडान पनि प्रभावित भएका छन् । बिहानैदेखि देशका विभिन्न ठाउँमा बाक्लो हुस्सु र कुहिरो लागिरहेको छ ।

बिहीबार बिहान ओखलढुङ्गाको रुम्जाटार र भोजपुर विमानस्थलको उडान प्रभावित भएका छन् । भिजिविलिटी कम हुँदा लुक्ला, पोखरा, विराटनगरलगायतका विमानस्थलमा विमानले उडान भर्न सकेका छैनन् ।

मौसम खुले लगत्तै उडान थाल्ने त्रिभुवन अन्तर्राष्ट्रिय विमानस्थल कार्यालयले जनाएको छ ।