अपराध र अपराधी राष्ट्र विकास निर्माणको बाधक हुन :महानिरीक्षक खनाल

अन्जनराज न्यौपाने
तनहुँ, ५ माघ -नेपाल प्रहरीका महानिरीक्षक सर्वेन्द्र खनालले अपराध र अपराधी विकास र निर्माणका बाधक भएको आरोप लगाएका छन्। महानिरीक्षक खनालले समाजमा भए गरेका हरेक घटनाका प्रत्येक अपराधीले अपराध गरिसकेपछि समाजमा टाउको उठाउने मौका नपाउने र कानुन भन्दा माथि कोहीपनि नरहेको पनि बताए । जिल्ला स्थित भानु नगरपालिका–२ नारेश्वरटारमा इलाका प्रहरी कार्यालय भानुको भवन शिलान्यास कार्यक्रमका क्रममा बोल्दै महानिरीक्षक खनालले अपराधीलाई सजाय दिन प्रहरी हरदम प्रतिबद्ध रहँदै आएको बताउदै आपराधिक मानसिकताले विशेषगरी गरिबी र बेरोजगारीमा पिल्सिएका युवाहरु लागि प्रताडित पारेको बताए । उनले नेपाल प्रहरीले सामुदायिक साँझेदारी अन्तरगतको कार्यक्रममा प्रहरीले विद्यालयहरु,क्याम्पस र कलेजहरुमा जनचेतना जगाउने र सचेतनामुलक पम्प्लेट पोष्टर सडक दुर्घटना न्युनिकरण लगायतका अभियान नेपालका ७७ वटै जिल्लाहरुमा सामुदायिक साँझेदारी कार्यक्रमबाट चेतना फैलाउन नेपाल प्रहरी सफल रहेको दाबी पेश गरे ।समुदाय–प्रहरी साझेदारी अभियानअनुसार प्रहरी अगाडि बढेको र उक्त अभियानले शान्ति सुरक्षामा अमन चयन कायम राख्न सफल भएको जिकिर गरे । साथै महानिरिक्षक खनालले देशको चौतर्फी विकासका लागि प्रत्येक तह र तप्कामा रहेका संघ संस्थाहरुले प्रहरीसंग हातेमालो गरेर अघि बढनुपर्नेमा जोड दिदै भने ‘नेपालको शान्ति ,सुरक्षा स्थिति दिन प्रतिदिन मजबुत भएको र थप सुदृढ बनाउने हाम्रो प्रतिबद्धता छ’ महानिरीक्षक खनालले समाजमा शान्ति सुरक्षा प्रदान गर्ने प्रहरी आफैँ अनुशासित र कर्तव्यबोध प्रति सदैब सचेत र जिम्मेवार रहनुपर्नै बताए ।
‘नेपालमा संचालनमा आएका अस्थायी प्रहरी चौकीहरु भग्नावशेषहरु सिमित हुन दिईने छैनन’ उनले भने। जीर्ण भवनको उचित बस्तुगत अध्ययन गरि जीर्ण रहेका प्रहरी कार्यालयको भवन निर्माणलाई तीव्रता दिई पूर्वाधारयुक्त र सुविधा सम्पन्न बनाउन नयाँ प्रहरी कार्यालय भवन निर्माणलाई समेत अगाडि बढाइएको उनको भनाइ रहेको छ।

नव निर्मित प्रहरी भवनको सिलन्यास कार्यक्रममा बोल्दै ,जिल्लाका प्रमुख जिल्ला अधिकारी रुद्रप्रसाद पण्डितले प्रहरी र समुदाय बीच घनिष्ठ सम्बन्ध हुनु अपरिहार्य रहेको बताए । ‘सय जना ब्यक्तिका लागि १ जना प्रहरीको अहोरात्र खटाईका कारण जिल्लामा शान्ति सुरक्षा कायम भएको छ’ उनले भने । आत्मानुशासनका कारण घटना दिन प्रतिदिन घट्दै गएको बताउदै प्रजिअ पण्डितले नवनिर्मित भवनले यस क्षेत्रको समग्र शान्ति सुरक्षाको स्थितिमा सहयोग पुग्ने बताए । जिल्ला प्रहरी कार्यालय तनहुँका प्रहरी प्रमुख विनोद सिलवालका अनुसार , सो नवनिर्मित भवन रु २ करोड ६८ लाख ३६ हजार १२२ को लागतमा निर्माण हुन लागेको र २०७७ पुस २६ गतेसम्म निर्माण सम्पन्न हुने लक्ष्य राखिएको बताए ।

उक्त भवनका लागि काभ्रेस्थित ब्राइट मल्टी कन्स्ट्रक्सन प्रालिले भवन निर्माणको जिम्मेवारी पाएको छ। साढे दुई तल्लाको भवनको भूइँतलामा हिरासत कक्ष, सुरक्षा गार्ड कक्ष, पहिलो तल्लामा व्यारेक र दोस्रो तल्लामा सञ्चार कक्ष र कार्यालय प्रमुखको आवास रहनेछ । मजुवा सामुदायिक वनको स्वामित्वमा रहेको जीर्ण घर भाडामा लिई कार्यालय सञ्चालन हुँदै आएको छ । विसं २०१५ मा प्रहरी चौकीको रुपमा स्थापना भएको कार्यालय विसं २०५५ मा इलाका प्रहरी कार्यालयको रुपमा स्तरोन्नति भएको थियो । हाल इलाका प्रहरी कार्यालयमा प्रहरी निरीक्षकको दरबन्दी रहेको छ । उक्त कार्यालयले भानु मुकाम डुम्रेबाट पनि सेवा प्रवाह गर्दै आइरहेको छ ।