नेपाल एयरलाइन्सको घरेलु उडानको टिकट अब मोबाइल एपमा

काठमाडौं, माघ ७- राष्ट्रिय ध्वजाबाहक नेपाल एयरलाइन्सका विमानबाट आन्तिरक उडान गर्न हवाई टिकटको बुकिङ अब एपबाटै गर्न सकिने भएको छ ।

नेपाल एयरलाइन्सकै मोबाइल एपमार्फत घरमै बसेर क्लिक गरेकै भरमा आफूलाई चाहिएको गन्तव्यको टिकट खरिद गर्न सकिने जनाएको छ ।

अहिले एन्ड्रोइड मोबाइलका लागि मोबाइल एप्लिकेसन बनेर सेवा सुरु भइसकेको छ भने आइओएसबाट पनि केही सातामै यो सेवा सुरु हुनेछ ।

अहिले अनलाइन बुकिङको लागि इ(सेवा र आईएमई पेबाट भुक्तानी गर्न सकिने भएको छ । अन्तराष्ट्रिय उडानको टिकट अहिले अनलाइनबाट बुक गर्न सकिन्छ । त्यसबाहेक एपबाट समेत अन्तराष्ट्रिय उडानको टिकट समेत बुकिङ र खरीद गर्न सकिने प्रावधान ल्याउँदैछ ।

‘त्यसै गरी नेपाल एयरलाइन्स’ नाम रहेको राष्ट्रिय ध्वजावाहकको आधिकारिक मोबाइल एपबाट उडानमा हुने ढिलाइ र उडान रद्दलगायतका अन्य जरुरी सूचना पनि नोटिफिकेशनमार्फत् प्राप्त गर्न सकिनेछ ।