नयाँ सरकार बन्ने भएपछि पुरानै लयमा फर्कियो शेयरबजार, लगानीकर्ता उत्साहित

अर्थमन्त्रीमा एमालेका वष्णिु पौडेलको चर्चा चलेसँगै लगानीकर्ता उत्साहति भएको नेपाल पुँजीबजार लगानीकर्ता संघकी अध्यक्ष राधा पोखरेल बताउँछिन्

काठमाडौं । नेप्से परिसूचकले यो साता २२ सय बिन्दु नाघेको छ ।

यो एक वर्षअघिको अवस्थामा पुगेको हो । २०८० साउन ८ मा नेप्से २२००.५० विन्दुमा पुगेको थियो ।

लगानीकर्ता बजारप्रति सकारात्मक हुँदा त्यसको प्रभाव शेयर बजारमा परेको हो । सोही कारण कारोबार रकम पनि बढेको छ । नेपाली कांग्रेस र नेकपा एमालेबीचको नयाँ सत्ता समीकरण बनेसँगै शेयर बजारमा सकारात्मक प्रभाव देखिएको थियो ।

अर्थमन्त्रीमा एमालेका विष्णु पौडेलको चर्चा चलेसँगै लगानीकर्ता उत्साहित भएको नेपाल पुँजीबजार लगानीकर्ता संघकी अध्यक्ष राधा पोखरेल बताएकी छिन् । विगतमा उनी अर्थमन्त्री हुँदा शेयर बजारका लगानीकर्ताले रुचाएका कारण बजार बढेको थियो ।

यस्तो अवस्थामा अव आउने चैतमा राष्ट्र बैंकका गभर्नर महाप्रसाद अधिकारीको सेवा अवधि पूरा हुँदैछ । उनले पनि आफू जाँदाको वर्षमा मौद्रिक नीति वित्त नीतिले मागे जस्तो ल्याउन सक्ने देखिएको छ । यो भन्दा अघि वित्त नीतिले मात्रै पुँजी बजारलाई चलायनमान बनाउन नसक्ने भन्दै लगानीकर्ताले केन्द्रीय बैंकको बिरोध गर्दै आएका थिए । राष्ट्र बैंकले घरजग्गा कारोबार र शेयर बजारमा हस्तक्षेप गरेको कारण बजारले गति लिन नसेको गुनसोलाई यो पटकको मौद्रिक नीतिले सम्बोधन गर्नेमा सबै लगानीकर्ता आशाबादी रहेका छन ।

त्यसैले केन्द्रीय बैंकले आगामी साउन पहिलो साता केन्द्रीय बैंकले मौद्रिक नीति ल्याउँदैछ । उक्त नीतिले अर्थतन्त्रलाई चलायमान बनाउने अपेक्षा बजारले गरेको छ । मौद्रिक नीति लचक आउने र बजारलाई थप सहयोग पुग्ने अपेक्षाले पनि शेयर बजारमा केही सुधार ल्याइरहेको छ । बैंक ब्याजदर घट्दै जानु, बैंकमा लगानीयोग्य रकम (तरलता) पर्याप्त रहनुजस्ता कारणले पनि शेयर बजारमा सकारात्मक प्रभाव परेको देखिन्छ ।

कारोबार रकमका आधारमा साताभरमा बिहीबार सर्वाधिक बढी कारोबार भएको छ । आइतबार ६ अर्ब रूपैयाँमाथि कारोबार भएकोमा सोमबार ४ अर्ब ५६ करोड रूपैयाँ, मंगलबार ५ अर्ब ५३ करोड, बुधबार ५ अर्ब ७४ करोड र बिहीबार ७ अर्ब रूपैयाँ बढीको कारोबार भएको छ ।

अघिल्लो साता २२ अर्ब ७५ करोड कारोबार रकमसहित ३.३० प्रतिशतले बढेको बजार यो हप्ता भने झन्डै २९ अर्बको कारोबार रकमका साथ ४ प्रतिशतले बढ्कोे छ । साताको अन्तिम दिनसम्म आइपुग्दा बजार पुँजीकरण ४ प्रतिशतले बढेर ३३ खर्ब ६२ अर्बबाट ३४ खर्ब ९६ अर्ब पुगेको छ । गत साताको बिहीबार २११९.७० विन्दुमा रहेको परिसूचक आइतबार २१४०.९८ विन्दुमा पुग्यो ।

त्यस्तै, सोमबार २१३६.३५ विन्दुमा झरेर मंगलबार २१५२.१५ विन्दुमा पुग्यो । बुधबार २१७५.४१ विन्दुमा पुगेर बिहीबार भने २२०४.६१ विन्दुमा पुगेको हो । १८००–२२०० सम्म चलेको बजारले ५ पटक २२०० बिन्दुलाई परीक्षण गरिसकेको छ । बजार घट्दा कारोबार रकम खुम्चिनु र बढ्दा राम्रो कारोबार आउनुले बजारले सानोतिनो अवरोधलाई छिचोल्दै अघि बढ्न सक्ने देखिएको छ ।