नेप्सेमा हालसम्मकै उच्च रकमको कारोबार, परिसूचक ९४ अङ्कले बढ्यो

गत साताको नेप्से कस्तो थियो ?

गत साताको नेप्से कस्तो थियो ?

यो साता ८२ अर्ब ७१ करोड रुपैयाँबराबरको सेयर कारोबार भएको छ । अघिल्लो साता ९५ अर्ब ७३ करोड ८३ लाख रूपैयाँको सेयर कारोबार भएको थियो । यस साता केही सांसदको अभिव्यक्ति, बैंक तथा वित्तीय संस्थाको वित्तीय विवरणले अघिल्लो साताको तुलनामा सेयर कारोबार रकम घटेको छ ।नेपाल इन्भेष्टर्स फोरमका पूर्व अध्यक्ष छोटेलाल रौनियारले बैंक तथा वित्तीय संस्थाको वित्तीय विवरण सार्वजनिक भएपछि लगानीकर्तामा मिश्रित प्रभाव पर्दा कारोबार रकम घटेको बताए ।

संस्थागत लगानीकर्ताको २० करोड रुपैयाँको सीमा खारेज भएपछि बजारमा कर्जा प्रवाह हुन थालेको छ । चालु आवको मौद्रिक नीतिले संस्थागत लगानीकर्ताले २० करोडसम्म मात्रै सेयर धितो कर्जा लिन पाउने व्यवस्था हटाएको थियो । त्यसको प्रभाव बजारमा देखिन थालेको छ ।

साताभर सेयर कारोबार रकमका दृष्टिकोणले धेरै भए पनि नेप्से परिसूचक बढ्न सकेन । साताभरमा सेयर परिसूचक १०.७६ अंकले मात्र बढेको छ । गत साताको बिहीबार नेप्से २७५५ अंकमा थियो । साताको पहिलो दिन आइतबार सार्वजनिक बिदा परेकाले सेयर कारोबार भएन । सोमबार नेप्से परिसूचक ४०.७६ अंकले बढेर २७९६ बिन्दुमा पुगेको थियो ।

मंगलबार बजारमा ठूलो गिरावट आयो । नेप्से १४५.०५ अंकले घटेर २६५१.३३ बिन्दुमा झ¥यो । त्यसपछि बुधबार पुनः सेयर बजारमा सुधार आयो । त्यस दिन परिसूचक १०८.३५ अंकले बढेर २७५९.६८ बिन्दुमा पुग्यो । बिहीबार भने परिसूचक ६.७० अंक बढेको हो ।

नेप्से परिसूचकमा साताभरमा आएको उतारचढाव जस्तै कारोबार रकममा पनि उतारचढाव आयो । गत बिहीबार २१ अर्ब ४८ करोड ५२ लाख रुपैयाँभन्दा बढीको सेयर किनबेच भएकोमा सोमबार २१ अर्ब ६९ करोड ७९ लाख रुपैयाँको सेयर किनबेच भयो । मंगलबार नेप्से परिसूचक १४५.०५ अंकले घटेको दिन कारोबार रकम उल्लेख्य बढ्यो । सो दिन २३ अर्ब ५० करोड ३२ लाख रुपैयाँबराबरको सेयर किनबेच भएको थियो ।

बुधबार परिसूचक १०८.३५ अंकले बढे पनि कारोबार रकम भने धेरै नै खुम्चियो । सो दिन १७ अर्ब ६९ करोड २२ लाख रुपैयाँ बराबरको मात्रै सेयर खरिदबिक्री भएको थियो । यस्तै, बिहीबार कारोबार रकम बढेर १९ अर्ब ८१ करोड ९६ लाख रुपैयाँ पुगेको छ । कारोबारमा आएका १३ समूहमध्ये बैंकिङको बुधबार बाहेक अन्य दिन सेयर मूल्य घटेको छ । बुधबार भने यस क्षेत्रको सेयर मूल्य ३३.८५ अंकले बढेको थियो । गत बिहीबार ४३ खर्ब ७२ अर्ब ३६ करोड रुपैयाँ पुगेको कुल सेयर बजार पुँजीकरण यस साताको बिहीबार ४३ खर्ब ९१ अर्ब ९ करोड रुपैयाँ पुगेको छ ।