हरि चन्द उपकुलपतिको सल्लाहकारमा नियुक्त

१८ असार – अन्तर्राष्ट्रिय सम्बन्धका जानकार हरि चन्द “अग्निपुंज” मध्यपश्चिम विश्वबिद्यालयका उप-कुलपति प्रा डा नन्द बहादुर सिंहको सल्लाहकारको रुपमा नियुक्त भएका छन्। चन्दलाई मध्यपश्चिम विश्वबिद्यालयको कार्यकारी परिषद बैठकको निर्णयबाट प्रथम श्रेणी सरहको सुबिधा हुनेगरी उक्त जिम्मेवारीमा नियुक्त गरिएको हो।

मध्य-पश्चिम विश्वबिद्यालयलाई अत्याधुनिक र भ्रष्टाचारमुक्त बनाउने उप-कुलपतिको शंकल्प र विशिष्ट योजनालाई प्रभावकारी रुपमा कार्यान्वयन गर्नको लागि सोहि अनुसारको टिम बनाउने उप-कुलपतिको योजना अन्तर्गत चन्द सो जिम्मेवारीमा नियुक्त गरिएका हुन् ।

चन्दले लामो समयदेखि नेपालको अन्तर्राष्ट्रिय सम्बन्ध, कुटनीति र राजनीतिमा सैयौं लेख लेखेका छन् भने उनका थुप्रै अनुसन्धानमुलक लेखहरु समेत प्रकाशित छन्। अन्य दुई जना सहित चन्दले सम्पादन गरेको पुस्तक “नेपाल एण्ड इट्स नेबर्स इन द चेंजिंग वर्ल्ड” हाल बजारमा उपलब्ध छ।

उनले इलेक्ट्रिकल इन्जीनियरिंगमा प्रविणता प्रमाण पत्र तह, सिभिल इन्जीनियरिंगमा स्नातक, अन्तर्राष्ट्रिय सम्बन्धमा स्नातकोत्तरको अध्ययन पुरा गरि हाल अन्तर्राष्ट्रिय सम्बन्धमा नै विद्यावारिधि गरिरहेका छन्।