अमेरिकाको इडाहोमा अनौठो अफर– अवैध आप्रवासीको सुचना दिनेलाई एक महिनासम्म नि: शुल्क बियर

काठमाडौँ । अमेरिकाको इडाहोमा रहेको प्रसिद्ध बार द ओल्ड स्टेट सलुनले एउटा अचम्मलाग्दो प्रस्ताव गरेको छ । बारले सामाजिक सञ्जालमा अवैध आप्रवासीको सुचना दिनेलाई एक महिनासम्म नि: शुल्क बियर खुवाउने प्रस्ताव गरेको छ ।

बारले आफ्नो सामाजिक सञ्जालमा लेखेको छ– ’यदि कसैले अमेरिकी आप्रवासन र भन्सार प्रवर्तनलाई इडाहोमा अवैध आप्रवासी पहिचान गर्न र अमेरिकाबाट सफलतापूर्वक देश निकाला गर्न मद्दत गर्छ भने, उनीहरूले एक महिनासम्म बारमा असीमित नि:शुल्क बियर पाउनेछन् ।’ बारको यो पोष्ट अहिले सामाजिक सञ्जालमा भाइरल भएको छ । यो बार यसअघि ’विषमलिङ्गी जागरूकता महिना घोषणा गरेर विवादमा परेको थियो । बारले विषमलिङ्गीहरूले मात्र विशेष प्रस्ताव वा छुट दिने घोषणा गरेर विवादमा परेको थियो । बारको बियर नि:शुल्क गर्ने पोष्टमा अमेरिकी गृह सुरक्षा विभागले प्रतिक्रिया दिएको छ ।

अमेरिकी गृह सुरक्षा विभागको आधिकारिक ह्यान्डलले यो पोस्ट पुन: पोस्ट गर्दै १९९१–९४ को लोकप्रिय अमेरिकी टिभी कार्यक्रम ’डायनासोर’ का मुख्य पात्र अर्ल सिन्क्लेयरलाई आश्चर्यचकित हुँदै बियरको गिलास खसाल्दै गरेको तस्बीर पोष्ट गरेको छ । यसको अर्थ सरकारी विभागले पनि प्रस्तावमा आश्चर्य र हल्का हास्य व्यक्त गरेको छ । पोस्ट भाइरल भएपछि, केही मानिसहरूले यसको खिल्ली उडाएका छन् ।

अमेरिकी राष्ट्रपति डोनाल्ड ट्रम्पले आप्रवासन नीतिहरूलाई कडा बनाएपछि अहिलेसम्म हजारौं अवैध आप्रवासीलाई डिपोर्ट गरिएको छ । आधिकारिक तथ्याङ्क अनुसार, नोभेम्बर १५, २०२५ सम्ममा लगभग ५३ हजार आप्रवासीहरूलाई हिरासतमा लिइएको र डिपोर्ट गरिएको छ ।