चर्चित निर्वाचन क्षेत्र: सर्लाही-४ को चुनावी गणित, गगन र अमरेश आमने सामने

काठमाडौँ । फागुन २१ गते हुने प्रतिनिधि सभाको निर्वाचनमा सबै भन्दा बढी चर्चामा रहेको क्षेत्र मध्ये एक सर्लाहीको ४ नम्बर क्षेत्र बनेको छ । यसको प्रमुख कारण नेपाली काँग्रेसका सभापति गगन थापा उम्मेदवार बनेका कारण यो क्षेत्रमा सबैको नजर रहेको छ ।

सर्लाही ४ सर्लाही जिल्लाका चार मध्येको एक निर्वाचन क्षेत्र हो । सलाही ४ मा धनकौल गाउँपालिका, रामनगर गाउँपालिका, बलारा नगरपालिका, बरहथवा नगरपालिकाको वडा नम्बर १ देखि ४ सम्म र वडा नम्बर १३ देखि १५ सम्म, विष्णु गाउँपालिकाको वडा नम्बर १ देखि ४ सम्म र बासबरिया गाउँपालिकाको वडा नम्बर १ देखि ३ सम्म रहेका छन् ।

सर्लाही-४ बाट यस निर्वाचनमा मतदान गर्न सक्ने कुल मतदाताको संख्या एक लाख २१ हजार १२ रहेको छ । यस क्षेत्रमा यस निर्वाचनमा १५४ मतदान केन्द्र तोकिएको छ ।

पछिल्लो निर्वाचन

२०७९ मा भएको निर्वाचनमा यस क्षेत्रबाट स्वतन्त्र उम्मेदवार बन्दै डा। अमरेश कुमार सिंहले चुनाव जितेका थिए । सिंहले २० हजार १७ मत प्राप्त गरेका थिए । त्यस्तै काँग्रेसका नागेन्द्र कुमारले १८ हजार २५३ मत प्राप्त गरेका थिए भने स्वतन्त्र उम्मेदवार मधुमाला कुमारी यादवले १४ हजार ६२२ मत प्राप्त गरेकी थिइन् । त्यस्तै जसपा नेपालका राकेस कुमार मिश्रले ५ हजार ८१३ र बहुजन एकता पार्टी नेपालका राजा राम पासवानले ५ हजार १५८ मत प्राप्त गरेका थिए । त्यसैगरी जनमत पार्टीका राम बाबु रायले ३ हजार ४२९ मत प्राप्त गरेका थिए ।

त्यसैगरी यस क्षेत्रमा २०७९ मा समानुपातिकतर्फ नेपाली काँग्रेसले १६ हजार २९ मत प्राप्त गरेको थियो भने जनमत पार्टीले १२ हजार ५९५ मत प्राप्त गरेका थिए । त्यस्तै तत्कालिन माओवादी केन्द्रको ९ हजार ७९० मत प्राप्त गरेका थिए भने एमलेले ९ हजार ४७१ मत पाएको थियो । त्यस्तै बहुजन एकता पार्टी नेपालले ५ हजार ४४४ मत प्राप्त गरेको थियो भने जसपा नेपालले ५ हजार १५२ र लोस्पाले ३ हजार ६७३ मर प्राप्त गरेको थियो । यस क्षेत्रमा रास्वपाले ११ सय ९९ मत प्राप्त गरेको थियो ।

उम्मेदवार

यस निर्वाचन क्षेत्रमा यस पटक नेपाली काँग्रेसका सभापति गगन थापा उम्मेदवार बनेका छन् । त्यस्तै यसअघि स्वतन्त्र उम्मेदवार बनेर जित हासिल गरेका अमरेश कुमार सिंह भने यस पटक रास्वपाबाट उम्मेदवार बनेका छन् । त्यस्तै यस क्षेत्रमा नेकपा एमालेबाट रविशंकर कुसवाह उम्मेदवार बनेका बहने राप्रपाबाट प्रदीप झा उम्मेदवर बनेका छन् ।

निष्कर्ष

गगन थापाले यस क्षेत्रमा उम्मेदवारी दिएपछि यो यस चुनावको सबैभन्दा चर्चित क्षेत्र मध्ये एक बनेको छ । नेपाली काँग्रेसबाट प्रधानमन्त्रीका उम्मेदवार समेत रहेका थापाले उम्मेदवारी दिएपछि यस अघि जितेका डा। अमरेश कुमार सिंह डिफेन्सिभ बनेका छन् । काँग्रेसकै पुर्व नेता समेत रहेका सिंहका विवादित अभिव्यक्ति र आफ्नो विचारमा अडिक नभएका कारण आलोचित र चर्चाको केन्द्रमा रहने गर्दछन् । यस पटकपनि उनले जनकपुरमा बालेन प्रधानमन्त्री नबने आत्मदाह गर्ने र त्यसको केहिदिन पछि गगन थापाले चुनाव जितेमा आत्मदाह गर्ने बताएर आफ्नो अस्थीर छबी फेरी प्रकट गरेका छन् । अर्कोतर्फ गगन थापाले भने अहिलेसम्म पार्टीकै विवाद मिलाउन व्यस्त छन् र छिट्टै सर्लाही जाने तयारीमा रहेका छन् ।

अहिले नै चुनावको नतिजा अनुमान गर्न नसकिने भएपनि गगनले सर्लाही( ४ बाट उम्मेदवारी दिएर सिंगो मधेसमा काँग्रेसको प्रभाव बढाउन खोजेको बुझ्न सकिन्छ । यस क्षेत्रमा एमाले, नेकपा, जसपा नेपालका उम्मेदवारले कति मत पाउछन भन्नेले पनि नतिजालाई प्रभाव पर्न सक्छ । अघिल्लो निर्वाचनमाको मत परिणाम र अहिलेको राजनीतिक अवस्थाको सिधै तुलना नै गर्न नमिल्ने अवस्था रहेको छ । वारेस मार्फत उम्मेदवारी दर्ता गरेका गगनले सर्लाही गएर आफुलाई कसरी प्रस्तुत गर्छन् र त्यसलाई सर्लाही(४ का मतदाताले कसरी लिन्छन् त्यो हेर्न बाँकी रहेको छ ।