इरानका सर्वोच्च नेता खामेनी मारिएको ट्रम्पको दाबी

काठमाडौं । अमेरिकी राष्ट्रपति डोनाल्ड ट्रम्पले इरानका सर्वोच्च नेता आयातुल्लाह अली खामेनीको मृत्यु भएको दाबी गरेका छन् ।

ट्रम्पले सामाजिक सञ्जालमार्फत खामेनी इतिहासका सबैभन्दा कठोर व्यक्तिमध्ये एक रहेको उल्लेख गर्दै उनको मृत्यु इरानी जनता, अमेरिका तथा विश्वका लागि न्याय भएको बताएका छन् । यसअघि इजरायली अधिकारीहरूले पनि अन्तर्राष्ट्रिय सञ्चारमाध्यमसँग कुरा गर्दै भग्नावशेषबाट खामेनीको शव फेला परेको दाबी गरेका थिए । अमेरिका र इजरायलको संयुक्त आक्रमणमा खामेनेईको निवास पूर्ण रूपमा ध्वस्त पारिएको जनाइएको छ ।

तर इरान सरकारले भने खामेनीको मृत्यु सम्बन्धी समाचार असत्य रहेको जनाएको छ । इरानका विदेशमन्त्री अब्बास अराघचीले सर्वोच्च नेता जीवित रहेको र उनलाई सुरक्षित स्थानमा सारिएको बताएका छन् ।

आक्रमणका क्रममा खामेनीका ज्वाइँ र बुहारीको मृत्यु भएको दाबी पनि सार्वजनिक भएको छ । तेहरान सहर परिषद्का एक सदस्यले उनीहरूको ज्यान गएको बताएका छन्, तर यसबारे आधिकारिक पुष्टि भइसकेको छैन । अमेरिका वा इजरायलले पनि यस विषयमा कुनै प्रतिक्रिया दिएका छैनन् ।

शनिबार राति तेहरान र आसपासका क्षेत्रमा लगातार विस्फोट भएका थिए । इरानी सरकारी सञ्चारमाध्यमले राजधानीका विभिन्न स्थानमा आक्रमण भएको पुष्टि गरेका छन् । इरानको रेड क्रिसेन्ट संस्थाका अनुसार हालसम्म भएका आक्रमणमा दुई सयभन्दा बढी मानिसको मृत्यु भएको छ भने सात सय चालीसभन्दा बढी घाइते भएका छन् ।

एक विद्यालयमा क्षेप्यास्त्र खस्दा ८५ छात्राको मृत्यु भएको र ४५ जना घाइते भएको जानकारी पनि सार्वजनिक भएको छ । अमेरिका र इजरायलले इरानका कम्तीमा दस ठूला सहरलाई निशाना बनाएको बताइएको छ ।

यसको जवाफस्वरूप इरानले पनि ड्रोन र क्षेप्यास्त्र आक्रमण सुरु गरेको छ । इरानले इजरायलसहित मध्यपूर्वका नौ देशलाई लक्षित गर्दै आक्रमण गरेको दाबी गरिएको छ । इजरायलतर्फ करिब चार सय क्षेप्यास्त्र प्रहार गरिएको तथा कतार, कुवेत, जोर्डन, बहराइन, साउदी अरेबिया र संयुक्त अरब इमिरेट्समा रहेका अमेरिकी सैन्य आधारलाई निशाना बनाइएको जनाइएको छ ।

इरानले संयुक्त अरब इमिरेट्सको दुबई सहरमा समेत ड्रोन आक्रमण गरेको दाबी गरिएको छ । दुबईस्थित पाम होटल तथा बुर्ज खलिफा आसपास क्षेत्रमा आक्रमण भएको उल्लेख गरिएको छ भने बहराइनका केही आवासीय भवन पनि प्रभावित भएको खबर आएको छ ।