रिसोर्टबाट ९ जुवाडे पक्राउ

मदन तिमल्सेना,

तनहूँ, ११ भाद्र – तनहुँ व्यास नगरपालिका वडा नम्बर ११ को वेलटारीमा काैडा खेली रहेको अवस्थामा प्रहरीले केही रकम र ९ जना जुवाडेलाई बुधबार राती प्रहरीले पक्राउ गरेको छ । बेलटारीमा रहेको घासिकुवा रिसोर्टमा जुवा खेलाउने र समाजमा विकृति फैलाइरहेको जानकारी प्राप्त भएर प्रहरीले उक्त छापा मारेको थियो ।

प्रहरीले काैडा खेलाउने रिसोर्ट संचालक र पक्राउ जुवाडेहरुलाई मुद्दा चलाउने तयारी गरेको जिल्ला प्रहरी कार्यालय तनहुँका प्रवक्ता एवं डिएसपी युवराज तिमल्सेनाले जानकारी दिए ।लकडाउनको समयका साथै अन्य समयमा पनि व्यास नगरपालिका क्षेत्र लगायतका अन्य स्थानहरुमा जुवा खेलाएको सूचना आएको कारण प्रहरी चनाखो भएर विकृति उन्मुलन गर्न कारवाही थालेको उनले बताए ।

जिल्ला प्रहरी कार्यालय तनहुँमा नयाँ प्रहरी प्रमुखमा एसपी अरुण पौडेलको आगमन पश्चात गैरकानुनी काम गर्नेहरु र कानुनको दायरामा नआईकन फरार हुनेहरुलाई कडाई गरिएको छ । प्रहरीको उक्त कदमले समाजमा शान्ति सुरक्षा कायम गर्न बल पुग्ने बुद्धिजिवीहरुको भनाई रहेको छ ।