असन बजारमा छैन कोरोना संक्रमणको डर !

काठमाडौं, असोज २० – सबै कुरा ठीकसँग चलेको हुन्थ्यो भने यतिखेर सबैभन्दा धेरै असहज चाहिँ यही बजार छिर्दा भोगिन्थ्यो। उपत्यकाकै पुरानो बजार असनमा मानिसको चहलपहल त देखिन्छ तर पहिले जस्तो देखिन्थ्यो, त्यस्तो चाहिँ होइन।

लामो लकडाउन र निषेधाज्ञापछि मानिसहरुको चहलपहल अनुभूति गर्न सकिन्छ। देख्दा भिडभाड नै लाग्छ पनि। तर, विगतलाई तुलना गर्दा यो दसैंको मुखमा देखिने असनको चहलपहल भन्नेखालको चाहिँ होइन। व्यापार र व्यवसाय दसैंमा झै जमेको छैन यहाँ।

सामान्य दिनमा असनको जे दृष्य देखिन्थ्यो त्यो दसैंको मुखमा देखिएको छ। भोटाहिटीदेखि इन्द्रचोकसम्म दसैंको मुखमा मानिसहरु हिँड्नै पर्थेन ठेलिएर यता र उता पुगिरहन्थे। तर, कोभिड-१९ ले गाँजेको छ यतिखेर।

मानिसहरु मिलेसम्म जोखिम मोल्न चाहने अवस्थामा छैनन्। तर बाध्यता र रहरको दोसाँधमा बजार चाहिँ चलिरहेकै छ। मानिसहरु आउजाउ गरिरहेकै छैन। तै पनि दसैंको पूर्व सन्ध्यामा जेजस्तो दृष्य यहाँ देखिन्थ्यो, त्यो चाहिँ देखिन्न। तर, लामो लकडाउन र निषेधाज्ञा पछि जे जति मानिस देखिएका छन् – त्यसले कम नै सहि चहलपहल चाहिँ गराएको छ।