चामल किलामै १० रुपैयाँ बढ्यो, धेरै तरकारीको भाउ यथावत

काठमाडौं, १६ माघ – दैनिक उपभोग्य खाद्य वस्तुहरुको मूल्यमा यो साता पनि उतारचढाव आयो । सर्वसाधारणको भान्सामा जरुरी चिनी, खाने तेल र चामलको मूल्य ब्यापारीहरुले यो साता पनि बढाएका छन् ।

साताभर हरियो मौसमी तरकारीमा काउलीको मूल्यमा दोब्बर बढेको छ भने गोलभेडा, बन्दालगायतका तरकारीको मूल्य स्थिर छ । माछा र खसीको मासुको मूल्य स्थिर रह्यो भने कुखुराको मासुको मूल्य केही घटेको छ । जाडो मौसममा धेरै खोजी हुने हुनाले यो साता पनि खसीको खुट्टाको माग धान्न नसकेको मासु व्यवसायीहरु बताउँछन् ।

यो साता काउलीको मूल्य दोब्बरले बढेको छ । कालीमाटी तरकारी तथा फलफूल बजार विकास समितिका अनुसार गत आइतबार थोक बजारमा ८ देखि १० रुपैयाँसम्ममा कारोबार भएको काउली शुक्रबार १८ देखि २० रुपैयाँमा कारोबार भएको छ ।

त्यसबाहेक भान्सामा अत्यधिक मात्रामा प्रयोग हुने आलु, बन्दा, घिउसिमी, हरियो धनिया र गोलभेडाको मूल्य भने साताभर यथावत रहेको ब्यवसायी योगेन्द्र ढुंगानाले बताए ।

क्र.सं	तरकारीको नाम	थोक मूल्य किलोमा
१	रातो आलु	२५–३०
२	सेतो आलु	१६–१८
३	काउली खानीखोला	२५
चितवन र मकवानपुर	१८ २०
४	बन्दा	१५
५	घिउसिमी	७०–८०
६	हरियो धनिया	७०–८०
७	गोलभेडा	२२–२२
८	कांक्रो स्थानीय	११०
९	सुकेको प्याज भारतीय	६०–७०

यो साता ब्रोइलर कुखुराको मासुको मूल्य किलोमा २० रुपैयाँसम्म घटेको छ । अनलाईनखबरले संकलन गरेको खुद्रा मूल्यअनुसार आइतबार ३८५ रुपैयाँ किलोमा बिक्री भएको ब्रोइलर कुखुराको मासु शुक्रबार प्रतिकिलो ३६५ मा कारोबार भएको छ ।

खसीको मासु १२ सय रुपैयाँमा कारोबार भएको छ । जाडोका कारण खसीको खुट्टाको खोजी भने धेरै रहेको मासु व्यवसायी पूर्णबहादुर श्रेष्ठले बताए । यस्तै माछा स्थानीय बजारमा साताभर नै प्रतिकिलो ५ सय रुपैयाँमा कारोबार भइरहेको छ ।

भारतीय जिरा मसिनो चामलमा यो साता किलोमै १० रुपैयाँ वृद्धि भएको छ । प्रतिकिलो ५६ रुपैयाँमा पाइने यो चामल ६६ रुपैयाँमा होलसेल मूल्य कायम भएको राष्ट्रिय खुद्रा ब्यापार संघका सदस्य ध्रुब अधिकारीले बताए । त्यसबाहेक साताभर अन्य खाद्यवस्तुको मूल्यमा खासै फरक देखिएको छैन ।

पछिल्लो तीन महिनामा अचाक्ली वृद्धि गरिएको खाने तेलको मूल्य यो साता पनि यथावत रह्यो । तीन महिनादेखि बढेको तेलको सोही मूलयमा खरिद गर्न उपभोक्ता बाध्य भए । यस्तै दैनिक प्रयोगको अर्को महत्वपूर्ण वस्तु चिनीमा पनि होलसेल व्यापारीले प्रतिकिलो दुई रुपैयाँले मूल्य बढाएका छन् । ७८ रुपैयाँ चिनीको मूल्य सरकारले तोके पनि बजारमा थोक मूल्य ८० पुगेको र खुद्रा मूल्य ८५ रुपैयाँ कायम भएको खुद्रा व्यापार संघले जनाएको छ । साताभरको प्रमुख खाद्यन्नको मूल्य सूची यस्तो छ

कानुनले स्वच्छ बजार कायम गर्ने अधिकार वाणिज्य, आपूर्ति तथा उपभोक्ता संरक्षण विभाग, खाद्यप्रविधि तथा गुण नियन्त्रण विभाग, जिल्ला प्रशासन कार्यालय र सबै स्थानीय तहलाई दिएको छ ।

केही खाद्य वस्तुमा नियोजित रुपमा उद्योगी र व्यापारीले मूल्य बढाएका छन् । तर यो साता वाणिज्य विभागले केही कर्मकाण्डी अनुगमनबाहेक अरु कुनै पनि निकायले स्वच्छ बजारका लागि काम गरेनन् ।

केन्द्र सरकार र कर्मचारी प्रशासनका निकाय जनताप्रति उत्तरदायी भएनन् नै निर्वाचित जनताको प्रतिनिधिमूलक स्थानीय निकायसमेत स्वच्छ बजार र कालोबजारी नियन्त्रणमा लागेको पाइएन ।