पत्रकार महासंघ रुपन्देहीमा ५ संगठनको गठबन्धन

काठमाडौं, चैत १८ – नेपाल पत्रकार महासंघको आसन्न निर्वाचनका लागि रुपन्देहीमा पत्रकार सम्वद्ध पाँच संगठनहरुले चुनावी गठबन्धन गरेका छन् । नेपाल प्रेस यूनियनको नेतृत्वमा प्रेस संगठन, प्रेस चौतारी (माधव नेपाल पक्ष), प्रगतिशील पत्रकार संघ र क्रान्तिकारी पत्रकार महासंघबीच गठबन्धन भएको हो ।

पूर्ण प्रेस स्वतन्त्रताको रक्षा, पेशागत सुरक्षा र श्रमजिवी पत्रकारको अधिकार स्थापित गर्दै लोकतन्त्र र अग्रगमनको पक्षमा दृढतापूर्वक उभिन र जिल्लाका सञ्चार गृहहरुको प्रवर्द्धनमा साझा भूमिका निर्वाह गर्न संयुक्त लोकतान्त्रिक प्यानल बनाइएको प्रेस युनियन कार्यदलका संयोजक हरि लम्सालले बताए ।

महासंघ रुपन्देहीमा लामो समयदेखि प्रेस चौतारीको नेतृत्व रहँदै आएको थियो । एमाले नेता एवं अर्थमन्त्री विष्णु पौडेलको चुनावी क्षेत्र भएकाले पनि पत्रकार महासंघ रुपन्देहीको निर्वाचनलाई प्रेस चौतारी (ओली पक्ष) र युनियन नेतृत्वको गठबन्धनले ठूलो प्रतिष्ठाको विषय बनाएका छन् ।

पाँच संगठनको गठबन्धनपछि जित सुनिश्चित भएको युनियन रुपन्देही अध्यक्ष रेखा भुसालको दाबी छ ।