विरामीको सन्तुष्टिका लागि सेवा दिइरहेका छौं–डा. रूपक घिमिरे

डा. रूपक घिमिरे
छाला विशेषज्ञ तथा कपाल प्रत्यारोपण सर्जन
अध्यक्ष, आवरण स्किन एन्ड हेयर क्लिनिक

स्याङ्जाको चापाकोटमा जन्मिएका डा. रूपक घिमिरे छाला विशेषज्ञ तथा कपाल प्रत्यारोपण सर्जन ‘डर्माटोलोजिस्ट’ हुन् । हाल काठमाडौंको दरबारमार्गस्थित आवरण स्किन एन्ड हेयर क्लिनिकका अध्यक्ष समेत रहेका डा. घिमिरे आफूलाई ‘बर्न सर्भाइभर’ भन्न रुचाउँछन् । जन्मनेवित्तिकै यो बच्चा बाँच्दैन भनेर उनका अभिभावकले माया मारेका थिए । तर गाउँमै पोस्टसेट हुने एकजना ‘सिस्टर’ले तै पनि म बचाउन कोशिस गर्छु भनेर आफ्नो छातीमा टाँसेको केहीबेरपछि घिमिरे बाँचेको र उनले आफूलाई ‘बर्न सर्भाइभर’ भन्ने गरेको बताउँछन् । आँबुखैरेनीबाट तत्कालीन निम्न माध्यमिक तहको शिक्षा हासिल गरेका उनले माध्यमिक तहको शिक्षा काठमाडौंको ज्ञानेश्वरस्थित ग्यालेक्सी पब्लिक स्कुलबाट हासिल गरेका हुन् । काठमाडौं विश्वविद्यालयबाट एमबीबीएस हासिल गरेका डा. घिमिरे शुरूमा कार्डियोलोजिस्ट बन्ने सोचमा थिए । तर, समयक्रमसँगै डर्माटोलोजिस्ट बन्ने सोच उनमा आयो र अहिले डर्माटोलोजिस्टकै रूपमा स्थापित डाक्टर हुन् । प्रस्तुत त, उनै डर्माटोलोजिस्ट डा. घिमिरेसँग छालामा देखिने समस्या, उपचार र तालुपना हुने कारणलगायत विषयमा गरिएको कुराकानी ः–

पछिल्लो समय तपाईं केमा व्यस्त हुनुहुन्छ ?
पहिला त म काठमाडौं मेडिकलमा पनि कार्यरत थिएँ । तर, गएको दशैंपछिदेखि पूर्ण रूपमा आवरण स्किन एन्ड हेयर क्लिनिकमा डर्माटोलोजिस्ट डाक्टरको रूपमा क्रियाशील छु ।
आवरण स्किन एन्ड हेयर क्लिनिक कहिलेदेखि सञ्चालनमा आयो ?
हाम्रो यो क्लिनिक शुरू भएको पाँच वर्ष पूरा भइसकेको छ । कपाल प्रत्यारोपणलाई बढी फोकस गरेर हामीले आजभन्दा पाँच वर्षअगाडि काठमाडौंको बत्तिसपुतलीबाट सेवा दिन शुरू गरेका हौं । तर, हामीले जहाँबाट सेवा शुरू ग¥यौं उक्त स्थान साँघुरो भएकाले फराकिलो ठाउँ खोज्ने क्रममा अहिले हामी तीन वर्षदेखि दरबारमार्गमा छौं ।

आवरणले के–कस्तो सेवा प्रवाह गर्दै आएको छ ?
हामीले कपाल प्रत्यारोपणका साथै प्लास्टिक सर्जरीहरू जस्तैः ब्रेस्ट सर्जरी, फेस लिफ्टिङ, डिम्पल क्रिएशन, ब्रो लिफ्टिङ, राइनोप्लास्टी, ब्रेस्ट लिफ्टिङ, ब्रेस्ट रेडुकेशन, फ्याट ग्राफ्टिङ र गाइनोकोमास्टियालगायत सेवा दिँदै आएका छौं । सरसरती भन्दा हामीले हाम्रो नाम ‘आवरण’ जस्तै शरीरको बाहिरी आवरणका सम्पूर्ण सेवा दिन्छौं । साथै पछिल्लो समय हामीले स्लिम हुने, पेट घटाउनेदेखि खुट्टाको नङ निकाल्नेसम्मको सेवा पनि दिइरहेका छौं ।

आवरणले दिने सेवाको गुणस्तरचाहिँ कस्तो छ ?
विशेषज्ञ डाक्टरहरूबाट सेवा प्रदान गरिने भएकाले आवरणको सम्पूर्ण सेवा शतप्रतिशत गुणस्तरीय छ भन्ने हाम्रो दाबी छ । किनभने गुणस्तरीय सेवा प्रवाहका लागि नै भनेर हामीले विषयगत विशेषज्ञहरूद्वारा सेवा दिइरहेका छौं ।
आफ्नो शरीरको आवरण सुरक्षाका लागि विशेषज्ञ सेवा लिने ग्राहकको संख्या कत्तिको छ ?
वास्तवमा भन्ने हो भने अधिकांश मासिहरू अहिले पनि शुरूमा विशेषज्ञ सेवाका अलावा घरेलु उपचारमै अलमलिएको देखिन्छन् । जुन कुराले उहाँहरूमा सानो–सानो समस्याले ठूलो–ठूलो समस्या निम्त्याएको मैले पाएको छु । छालामा सामान्य समस्या देखियो भने महिलाहरू शुरूमा नजिकको ब्युटीपार्लर जाने गर्नुहुन्छ र धेरै समयपछि पनि समाधान नभएपछि मात्रै अन्तिममा विशेषज्ञकहाँ पुग्ने गर्नुभएको छ । यो मानसिकताले हामीमा थप समस्याहरू सृजना भइरहेका छन् ।
जस्तो तपाईंको लोकप्रिय मिडियामार्फत म एउटा उदाहरण दिउँ कि केही दिनअघि मात्रै एकजना महिला हामीकहाँ आउनुभएको थियो । उहाँले शुरूमा गालामा आएको कोठी हटाउन युट्युबमा भिडियो हेरेर चुना लगाउनुभएछ । तर, चुनाले उहाँको कोठी हटाउनाको सट्टा गालाभरी दागैदाग निकालिदिएको थियो । अहिले उहाँको उपचारमा लामो समय खर्चिनुपर्ने अवस्था छ भने तुलनात्मक रूपमा खर्च पनि बढी लाग्ने भएको छ ।
डाक्टरकोमा गएर उपचार गराउँदा साइडइफेक्ट हुन्छ भन्ने डरले घरेलु वा अनधिकृत उपचार गर्दा मानिसहरूमा धेरै समस्याहरू आएको मैले देखेको छु ।

होमियोप्याथी र आयुर्वेद उपचार पद्धतीबीचमा कस्तो भिन्नता पाइन्छ ?
सम्बन्धित वा असम्बन्धित भन्दा पनि दुईवटै विधाको आ–आफ्नै महत्व छ । जस्तो केही समयअघि हामीले कोभिडको संक्रमणबाट जोगिन बेसारपानी, गुर्जो वा अन्य घरेलु औषधीय वस्तुको प्रयोग गर्ने भन्यौें । तर, अन्तिममा हामीले कोभिड–१९ भ्याक्सिनकै भर पर्नुप¥यो नि । भनेपछि कुरा के हो भने आर्युवेदले प्लान्ट नै खाऊ भन्छ तर हामीलेचाहिँ त्यो प्लान्टको स्ट्रयाक के हो त्यो प्रयोग गर्न खोज्छौं ।

छालामा हुने समस्याको कुरा गर्दा कुन उमेर समूह वा लिङ्गका व्यक्तिहरूमा समस्या बढी देखिन्छ ?
यो विषयलाई मैले यसरी भन्न सक्छु, जस्तोः भर्खरै जन्मिएका बच्चाहरूमा जन्मजात समस्या पनि हुन सक्छ । त्यसपछि १–२ वर्षतिर शरीरका छाला चिलाउने समस्या हुन सक्दछ । त्यस्तै ११–१२ वर्षको उमेर हुँदा टाउकोतिर दादहरू र त्यसपछि धेरै मानिसमा एक्नी (डण्डीफोरहरू) को समस्या देखिन्छ । यो समस्या करिब २५ वर्षसम्मै रहन सक्छ । त्यसपछि महिलाहरूको हकमा चायाँपोतोको समस्या देखिन्छ भने पुरुषहरूमा कपाल झर्ने समस्या देखिन्छ । यस्तो समस्या ४० वर्षसम्म रहन सक्छ र त्यसपछि छालाहरू सुक्खा भएर चिलाउने समस्या देखिन्छ ।

तालु र छालासँगको सम्बन्ध कस्तो हो ? तालुपना कसरी हुन्छ ?
छाला हाम्रो शरीरको सबैभन्दा ठूलो अग्र्यान हो, यो टाउकोदेखि खुट्टासम्मै हुन्छ । आधारभूत रूपमा तालुपना कसरी र किन हुन्छ भने हाम्रो छालामा इपिडर्मिस, डर्मिस र कनेक्टिभ टिस्यु गरी तीनओटा लेयर हुन्छ । हाम्रो टाउकोमा कपाल पनि यसैबाट हुने हो । त्यसकारण स्किनको एउटा महत्वपूर्ण भाग भनेको कपाल पनि हो ।
अब तालुपना कसरी हुन्छ भने हाम्रो टाउकोको कपाल हरेक ३ देखि ४ वर्षको अन्तरालमा परिवर्तन हुन्छ, जहाँ पुरानो झर्ने र नयाँ पलाउने प्रक्रिया नियमित भइरहेको हुन्छ । यद्यपि मानिसको खानपान, उसले गर्ने तनाव व्यवस्थापन र अन्य धेरै कुराहरूले पनि कपाल झर्ने कुरासँग सम्बन्ध राखिरहेको हुन्छ । यस्तो अवस्थामा कपाल झर्छ तर पलाउने क्रम रोकिन सक्छ । यो विभिन्न खालको हर्मोनहरूका कारणले पनि हुन सक्दछ जसले हामीलाई तक्लु नै बनाइदिन्छ ।

यी यावत समस्याको समाधानका लागि मानिसहरू आवरणमा नै किन आउने, के छ यहाँको फरक विशेषता ?
हाम्रो मुख्य विशेषता भनेको भरपर्दो सेवा हो । किनभने कसका लागि के उपचार वा सल्लाह चाहिएको छ त्यो मात्रै हामी दिन्छौं न कि पैसा आम्दानीका लागि अनावश्यक सेवा, सल्लाह र उपचार । सम्वेदनशीलताका साथ हामीले दिने सेवा नै हाम्रो मुख्य विशेषता हो ।

भविष्यमा आवरणको अन्य योजना केही छ कि ?
छालासम्बन्धी सम्पूर्ण रोग र विभिन्न दुर्घटनाहरूबाट छालामा हुने क्षतिको तत्काल उपचार हुनसक्नेगरी एउटा ‘स्किन सेन्टर’ निर्माण गर्ने हाम्रो योजना छ । यद्यपि सोही प्रकृतिको अस्पतालहरू नै खुल्ने क्रम चलिरहेको छ, तर त्यो भन्दा पनि पृथक ढङ्गबाट सेवा दिनेगरी त्यस्तो एउटा प्रभावकारी प्लेटफर्मको विकास गर्ने ठूलो चाहना छ ।

स्किनको उपचारसम्बन्धी केही सुझाव दिन चाहानुहुन्छ ?
विद्यमान सामाजिक सञ्जालको धेरै भर नपरी सम्बन्धित विशेषज्ञबाट आवश्यक सल्लाह लिन म अनुरोध गर्दछु । ‘रे’ को भरमा गरिएका कतिपय औषधिउपचारले तपाईंलाई दीर्घकालीन समस्या पनि ल्याइदिन सक्छ, त्यसतर्फ सबैजना सचेत हुन जरुरी छ ।