‘प्रदेश २ को विकासका लागि कनेक्टिभिटी’

वीरगञ्ज । प्रदेश २ को आर्थिक सम्भाव्यता दोहनका लागि सीमावर्ती भारतीय राज्यहरूसितको कनेक्टिभिटीलाई प्रभावकारी बनाउनुपर्नेमा जोड दिइएको छ ।

प्रदेश २ का ८ ओटै जिल्लाको सिमाना भारतसित जोडिएकाले सीमावर्ती सम्भाव्यता उपयोगका लागि आवागमन र पारहवन सहज हुनुपर्ने सरोकारका पक्षले बताएका छन् । वीरगञ्ज मुलुककै मुख्य व्यापारिक नाकाबाट मात्र नभएर उत्पादन र आपूर्तिको मुहान पनि भएकाले यो क्षेत्रको कनेक्टिभिटी बलियो हुनुपर्ने प्रदेश २ का सिँचाइ तथा ऊर्जामन्त्री ओमप्रकाश शर्मा बताउँछन् ।

सीमावर्ती क्षेत्रमा रहेकाले नेपालका मुख्य शहरीक्षेत्रसँगै भारततर्फको कनेक्टिभिटीले पनि महत्त्व राख्दछ,’ शनिवार वीरगञ्जमा आयोजित कार्यक्रममा मन्त्री शर्माले भने । बारा–पर्सा क्षेत्र मुख्य औद्योगिक केन्द्र भएकाले यहाँसम्म कच्चा पदार्थको आपूर्ति र उत्पादनको ढुवानीलाई सहज बनाउनुपर्ने निजीक्षेत्रको भनाइ छ । प्रदेश २ सरकारले सडक र हवाई यातायातलाई प्राथमिकतामा राखेको पनि शर्माले उल्लेख गरे ।

संघ सरकारले २ नम्बर प्रदेशको आर्थिक सम्भावना र महत्त्वलाई बुझेर अन्तरप्रदेश सम्पर्कका माध्यमलाई जतिसक्दो सहज बनाउनुपर्ने तर्क शर्माको छ । वीरगञ्ज उद्योग वाणिज्य संघको पूर्वअध्यक्षसमेत रहेका शर्माले विगतदेखि नै यातायातमा जोड दिँदै आएका थिए । ‘यातायात नै विकासको आधार भएकाले सडक तथा हवाई सेवालाई प्रभावकारी बनाउनुको विकल्प छैन ।

जहाँ यातायात पुग्छ, विकास पनि त्यतै जान्छ,’ हालै प्रदेश २ को सिँचाइ तथा ऊर्जामन्त्री बनेका शर्माले भने । वीरगञ्ज उद्योग वाणिज्य संघले पनि सीमावर्ती क्षेत्रमा नेपाल–भारत आवागमनका पूर्वाधार र उपयोगको पहल अगाडि बढाएको छ । भारतीय रेलवेका अधिकारीहरूलाई वीरगञ्जमै बोलाएर रक्सौलबाट भारतका ठूला शहरहरूमा सीधा रेलसेवा सञ्चालनका लागि पहलको आग्रह गरिएको संघका अध्यक्ष सुबोधकुमार गुप्ता बताउँछन् ।

प्रदेश २ भारतको विहार राज्यसित जोडिएकाले कम्तीमा बाराको सिमराबाट विहारको पटनासम्मको उडान खोल्नुपर्ने र त्यसका लागि संघ सरकारले तत्काल पहल थाल्नुपर्ने धारणा शर्माको छ । ‘बाराको निजगढमा निर्माणाधीन दोस्रो अन्तरराष्ट्रिय विमानस्थल कहिले बनिसक्ने टुंगो छैन । अहिलेका लागि सिमरा–पटना उडान हुन सके आवतजावत धेरै सहज हुन सक्छ,’ उनले भने ।

मुख्य नाका र व्यापारिक केन्द्र भएकाले व्यवसायी, प्राविधिक, परामर्शदाताको आवागमन भइरहने हुँदा यातायात सहज हुनुपर्ने नेपाल–भारत सहयोग मञ्चका अध्यक्ष अशोकुमार वैद बताउँछन् । संघका पूर्वअध्यक्षसमेत रहेका वैदले आप्mनो कार्यकालमा सीमावर्ती भारतीय विहारका राजनीतिकर्मीहरूको सहभागितामा बोर्डर समिट गराएका थिए । त्यसबेला रक्सौल–मोतीहारी सडक स्तरोन्नति, रेलवेमा आकाशेपुल र रक्सौल विमानस्थल सञ्चालनको एजेन्डमा छलफल गराएका थिए ।

भारतीय सहभागीहरूले ती एजेन्डाको कार्यान्वयनमा पहल गर्ने प्रतिबद्धता व्यक्त गरेका थिए । भारतको रक्सौल मुख्य सडकमा पर्ने रेलवे क्रशिङमा घण्टौं जाम लाग्दा आवागमन अस्तव्यस्त हुने गरेको छ । औद्योगिक कच्चा पदार्थ र तयारी वस्तु बोकेका ढुवानीका साधन जाममा पर्ने गरेको औसत गुनासो व्यवसायीहरूको छ । रक्सौलको रेलवे क्रशिङमा यसै वर्षदेखि दुईपांग्रे सवारीसाधनका लागि आकाशेपुल निर्माण थालिएको आजको आर्थिक अभियान दैनिकमा समाचार छ ।