अर्थमन्त्रालयले नेप्सेसँग माग्यो सर्वोत्तमको सेयर कारोबार विवरण

काठमाडौं । अर्थमन्त्रालयले नेपाल स्टक एक्सचेन्जसँग सर्वोत्तम सिमेन्ट कम्पनी सेयर खरिदबिक्रीको विवरण मागेको छ । सर्वोत्तम सिमेन्टले बुक विल्डिङबाट सेयर निष्कासन गर्ने अनुमति पाएसँगै धितोपत्र बोर्डका अध्यक्ष भिष्मराज ढुंगाना र नेप्सेका सीईओ चन्द्रसिंह साउद विवादमा मुछिएका थिए । ढुंगानाले छोरीका नाममा र साउदले श्रीमतीको नाममा सेयर खरिद गरेसँगै यो विषय अख्तियारमा पुगेको छ ।

यसको चौतर्फी विरोध भएपछि अर्थले यस विषयको अध्ययन गर्नका लागि नेप्सेसँग ओटीसी कारोबारको जानकारी मागेको हो ।पदमा बहाल रहेका नियामक निकायका पदाधिकारीका परिवारका नाममा सर्वोत्तमको सेयर किन्नु नियमविपरीत भएको र स्वार्थ बाझिएको भन्दै चौतर्फी विरोध हुँदै आएको छ । यसअघि नै अर्थमन्त्रालय र अख्तियारले समेत धितोपत्र बोर्डका अध्यक्ष ढुंगानासँग सोधपुछ गरिरहेको छ ।