थप १ हजार २६८ जनामा कोरोना संक्रमण पुष्टि ,९ जनाको मृत्यु

काठमाडौं, १९ भदौ ।  नेपालमा थप एक हजार २६८ जनामा कोरोना संक्रमण पुष्टि भएको छ ।

पछिल्लो २४ घण्टामा नौ हजार ८७५ वटा स्वाब नमुनाको परीक्षण गरिएकोमा एक हजार २६८ जनाको नतिजा पोजिटिभ आएको हो । ६ हजार ७५३ नमुनाको पीसीआर परीक्षण गर्दा एक हजार २४ र तीन हजार १२२ नमुनाको एन्टिजेन विधिबाट परीक्षण गर्दा २४४ जनामा संक्रमण देखिएको हो ।  पछिल्लो २४ घण्टामा कोरोनाका कारण नौ जनाको मृत्यु पुष्टि भएको छ । योसँगै नेपालमा कोरोनाका कारण मृत्यु हुनेको संख्या १० हजार ८१८ पुगेको छ ।

पछिल्लो २४ घण्टामा देशभर दुई हजार १९५ जना निको भएका छन् । योसँगै नेपालमा कोरोनामुक्त हुनेको संख्या सात लाख २५ हजार ६५१ पुगेको छ ।

हाल देशभर सक्रिय संक्रमितको संख्या ३१ हजार ८२६ रहेको स्वास्थ्य तथा जनसंख्या मन्त्रालयले शनिबार जनाएको छ ।