फिल्म क्षेत्रलाई चलायमान बनाउन फिल्म रिलिज गर्ने जरुरी छ-महासचिव अशोक शर्मा

भाद्र २९, काठमाडौं । फिल्म क्षेत्र चलायमान बनाउन तीन प्रतीक्षित नेपाली फिल्मलाई रिलिजको तयारी थालिएको छ । चलचित्र संघ र चलचित्र निर्माता संघले भोलि बोलाएको बैठकमा चपली हाइट ३, म यस्तो गीत गाउँछु २ र हिजो आजका कुरालाई रिलिज गर्नेबारे टुंगो लगाइने भएको छ ।

निर्माताले मागे बमोजिम लगानीको न्यूनतम सुनिश्चितता (एमजी) र हल तथा निर्माताले प्राप्त गर्ने हिस्साबारे बाँडफाँट भए भोलि नै यी दुई फिल्म दशैं तथा तिहारमा रिलिज हुनेछन् । प्रदर्शकको छाता संस्था चलचित्र संघका महासचिव अशोक शर्माले नेपाल प्रेसलाई भने, ‘सेयर र एमजीको कुरा टुंगियो भने भोलि नै यी तीन फिल्म रिलिजको टुंगो लाग्छ । फिल्म क्षेत्रलाई चलायमान बनाउन पनि रिलिजको जरुरी हुन्छ ।’

शर्माका अनुसार पहिलो साता निर्मातालाई ५५ प्रतिशत र दोस्रो साता ५० प्रतिशत सेयर दिनेबारे चलेको छलफल सकारात्मक रहेको र यसबारे निर्णय हुन बाँकी छ । ‘एमजीको लागि पनि कुरा सकारात्मक छ’ शर्माले जानकारी दिए ।

अहिले काठमाडौं उपत्यकास्थित फिल्म हलहरुलाई ५० प्रतिशत अकुपेन्सीमा खुलाउन अनुमति दिइएपनि देशव्यापी खुल्नुपर्ने र शतप्रतिशत अकुपेन्सी कायम हुनुपर्ने माग गर्दै चलचित्र संघले हल खोलेको छैन । मुलुकभरका हल खुलाउन संचार मन्त्रालयले पनि कोभिड संकट व्यवस्थापन केन्द्र (सीसीएमसी)लाई पत्र लेख्ने भएको छ । संचार सचिव बैकुण्ठ अर्यालले देशव्यापी हल खुलाउन सीसीएमसीमार्फत पहल गर्ने आश्वासन दिएका छन् ।