कर्पोरेट समाचारको प्रभाव : बुद्धिसागर लामिछानेको संयोजकत्वमा पाँच सदस्यीय छानविन समिति गठन

काठमाडौं । बुद्ध एयरको जहाजमा सोमबार समस्या आएपछि सरकारले पर्यटन मन्त्रालयका सहसचिव बुद्धिसागर लामिछानेको संयोजकत्वमा पाँच सदस्यीय छानविन समिति गठन गरेको छ ।
हवाई सुरक्षामा खेलाईची भएको भन्दै एक पछि अर्को आलोचना आउँदै गर्दा सरकारले संवेदनशील भई शक्तिशाली समिती गठन गरेको हो ।

पर्यटनमन्त्रीको समेत कार्यभार सम्हालिरहेका प्रधानमन्त्री शेरबहादुर देउवाकै निर्देशनमा बनेको समितिले अब मुलुकभित्र संचालनमा रहेका सबै जहाज र हेलिकोप्टरको परीक्षण गर्ने भएको छ ।
सोमबार बुद्ध एयरको पोखरा र विराटनगर उडानमा प्राविधिक समस्या देखिएको थियो । जसले गर्दा उडानमा रहेका यात्रुले ज्यान जोखिममा राखेरै आकाशमा घण्टौसम्म फन्का मारिरहे ।

बुद्ध एयरमा बारम्बार प्राबिधिक समस्या देखिनुमा बुद्धको एउटा विमान २३ र अर्को २४ बर्ष पुरानो रहेको थियो ।त्यति मात्र नभई विमानमा भएका अन्य सामान पनि पुरानै भएका कारण बिभिन्न समस्या देखिदै आईरहेको बुद्धमा यात्रा गर्ने यात्रुको गुनासो रहेको थियो । तर यात्रुका सुझावलाई अझै पनि वेवास्ता गरिने हो भने विमानमा फेरि पनि समस्या देखिनु र दुर्घटना हुँनुमा धेरै आशंका रहेको एवं ढुक्क भई यात्रा गर्न नसकिने यात्रुको भनाई रहेकोछ ।

विमान संचालकहरुकको उड्डयन प्राधिकरण सङ्गको मिलेमतो र एकलौटी दादागिरको अन्त्यका लागि सरकारले बनाएको छानबिन समितिले हवाई सुरक्षामा थप सुधार ल्याउन सक्ने र विभिन्न हेलिकोप्टर कम्पनी र फिक्स विङ कम्पनीका जहाजमा मानवीय र प्राविधिक त्रुटीमा कमि आउने मन्त्रालयका कर्मचारीको भनाई छ ।

छानविन गर्दा नेपालमा दर्ता भएका वायुसेवा कम्पनी र उनीहरुको जहाज र जनशक्तिको अवस्था अध्ययन गरिनेछ । कुनै पनि वायुसेवा कम्पनीको भौतिक, यान्त्रिक, अभिलेखीय, आइकाओको मापदण्ड पालना नगरेको, जहाज उत्पादक कम्पनीको म्यानुअल कार्यन्वयनमा कैफियत पाइएमा त्यो कम्पनीको जहाज संचालनमा रोक लगाउनेछ।