पोखरामा जेब्रा क्रसमै सवारीले ठक्कर दिँदा बालकको ज्यान गयो

पोखरा कार्तिक २३, पोखरामा सवारीसाधनको ठक्करबाट एक बालकको मृत्यु भएको छ । पोखरा – ५ पर्स्याङस्थित गणतन्त्र चोकको जेब्रा क्रसमा सवारीले ठक्कर दिँदा तनहुँ घर भई पोखराको शान्ति निकेतन स्कुलमा कक्षा ९ मा अध्ययनरत १४ वर्षीय शुभम् खनालको ज्यान गएको हो ।

जिरो किलोमिटर – विन्दवासिनी सडक खण्ड अन्तर्गत विश्वास आयल पेट्रोल पम्प नजिकैको जेब्रा क्रसमा बाटो काट्ने क्रममा आइतबार साँझ सवारी साधनले ठक्कर दिँदा गम्भीर घाइते भएका खनाललाई उपचारको लागि अस्पताल लगिएकोमा उपचारको क्रममा चिकित्सकले मृत घोषणा गरेको कास्की प्रहरी प्रवक्ता, डिएसपी सुवास हमालले जानकारी दिनुभयो ।

ठक्कर दिने सवारीसाधन फरार रहेको र हालसम्म पहिचान समेत हुन् नसकेको डिएसपी हमालले बताउनुभयो । दुर्घटनाको समयलाई आधार मानेर आसपासका स्थानका सिसिटिभी फुटेजहरू मार्फत ठक्कर दिने सवारीसाधनको पहिचान गर्ने काम भइरहेको डिएसपी हमालको भनाई छ ।