लघुवित्त संस्था खारेजीको माग राख्दै माइतीघरमा रिले अनशन सुरु

काठमाडौँ । लघुवित्त वित्तीय संस्थाहरूको ज्यादतीका विरुद्ध सडक सङ्घर्षमा उत्रिएका पीडितहरूले काठमाडौँको माइतीघर मण्डलामा रिले अनशन सुरु गरेका छन् ।

लघुवित्त संस्था विरुद्धको सङ्घर्ष समिति, नेपालको नेतृत्वमा मंगलबारदेखि अनिश्चितकालीन रिले अनशन सुरु भएको हो ।

पहिलो दिन अध्यक्ष मणिराम ज्ञवालीसहित पाँच जना सडकमा व्यानरसहित अनशन बसेका छन् ।

ग्रामीण अर्थतन्त्र उत्थानका नाममा लघुवित्त संस्थाहरूले गरिब निमुखा किसानहरूलाई चर्को ब्याजमा ऋणको भारी बोकाको र धरपकड गरेको भन्दै देशभरिका ऋणीहरू आन्दोलित भएका छन् ।

शान्तिपूर्ण आन्दोलन गर्दा सुनुवाइ नभएको भन्दै पीडितहरूको आन्दोलनलाई थप सशक्त र प्रभावकारी बनाउन मंगलबारदेखि अनिश्चितकालीन रिले अनशन सुरु गरिएको अध्यक्ष मणिराम ज्ञवालीले रातोपाटीलाई जानकारी दिए ।

सोमबार पीडितहरूले प्रधानमन्त्री पुष्पकमल दाहाल प्रचण्डलाई भेटी ज्ञापन पत्र बुझाएका थिए ।

पीडित ऋणीहरूले चक्रीय ब्याजमा कर्जा लगानी गरेर नाफा आर्जन गर्ने लघुवित्त संस्था नै खारेज गर्नुपर्ने माग राखेका छन् ।