पोखरामा कारले स्कुटरलाई ठक्कर दिँदा दुई युवतीको मृत्यु, को हुन् कार चालक

पोखरा । आइतबार साँझ पोखरामा कारले स्कुटरलाई ठक्कर दिँदा स्कुटरमा सवार गण्डकी मेडिकल कलेजमा अध्ययनरत दुई जना युवतीको मृत्यु भएको छ ।

मृत्यु हुनेमा पोखरा महानगरपालिका–२५ हेम्जा निवासी २३ वर्षीया अनिशा खड्का र पोखरा–५ बस्ने २४ वर्षीया भावना बराल छन् ।

पृथ्वीराजमार्गस्थित पोखरा—२६ सुन्दरीबजारमा पोखराबाट तालचोकतर्फ जाँदै गरेका बी एए ००४१ नं को निजी कारले विपरीत दिशाबाट आउँदै गरेको ग १३ प ३५७८ नं को स्कुटरलाई ठक्कर दिएको थियो ।

ठक्करबाट गम्भीर घाइते दुवै जनालाई उपचारका लागि पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पताल लगिएकामा उपचारका क्रममा चिकित्सकले मृत घोषणा गरेको जिल्ला प्रहरी कार्यालयका प्रहरी नायब उपरीक्षक श्रवणकुमार विकले जानकारी दिएका छन् ।

प्रहरीले कार चालक अर्घौं निवासी मानबहादुर बानियाँ र कारलाई नियन्त्रणमा लिएर घटनाको अनुसन्धान भइरहेको जनाएको छ ।