युरोपेली संघ द्वारा १ खर्ब ३९ अर्ब ३० करोड ४८ लाख ७५ हजार रुपैयाँ बराबरको सहयोग घोषणा

 

युरोपेली संघ (इयू) ले अफगानिस्तानलाई एक अर्ब युरो (१ खर्ब ३९ अर्ब ३० करोड ४८ लाख ७५ हजार रुपैयाँ) बराबरको सहयोगको घोषणा गरेको छ ।

यो रकम तालिबानको अन्तरिम सरकारलाई नभई संघले अफगानिस्तानमा काम गरिरहेका अन्तर्राष्ट्रिय सहायता एजेन्सी मार्फत अफगान जनता समक्ष पुर्याउने जनाएको छ ।

संघका प्रमुख उर्सुला वान डेर लेयनले भनेका छन्, ‘यो सहयोग मानवीय र सामाजिक आर्थिक प्रणाली ध्वस्त हुनबाट जोगाउनको लागि हो ।’

‘मानवअधिकारको सुरक्षासहित अफगानिस्तानलाई मद्दत गर्नको लागि हाम्रा सर्त स्पष्ट छन् । तर तालिबानको सजाय अफगानी जनतालाई दिनु हुँदैन । यो सहयोग अफगानी जनताको लागि हो,’ उनले भनेका छन् ।

वान डेर लेयनले इटालीमा भइरहेको जी–२० शिखर सम्मेलनको दौरान यो जानकारी दिएका हुन् ।