थप २४२ जनामा कोरोना संक्रमण, १ जना संक्रमितको मृत्यु

काठमाडौं – पछिल्लो २४ घण्टामा २४२ जना कोरोना संक्रमित थपिएका छन्। देशभर गरिएको ४ हजार १४५ पीसीआर र २ हजार ९९१ जनाको एन्टीजेन परीक्षणका क्रममा २४२ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ।

यो सँगै कुल संक्रमितको संख्या ८ लाख १८ हजार ७८७ जना पुगेको छ। कुल संक्रमितमध्ये ७ हजार ३०३ जना सक्रिय संक्रमित छन्। गत २४ घण्टामा ४४४ जना संक्रमित निको भएका छन्। यो सँगै देशभर निको हुनेको संख्या ७ लाख ९९ हजार ९८९ पुगेको छ।

उक्त अवधिमा १ जना संक्रमितको मृत्यु भएको मन्त्रालयले जनाएको छ। हालसम्म कोरोना संक्रमणबाट मृत्यु हुनेको संख्या ११ हजार ४९५ पुगेको छ। हाल ९८ जना क्वारेन्टाइनमा छन्। २३४ जना आइसीयू र ५५ जना भेन्टिलेटरमा रहेको मन्त्रालयले जनाएको छ।