एप्पल र स्पेसएक्सबीच सहकार्यको तयारी, आईफोनमा उपग्रहबाट इन्टरनेट चल्न सक्ने

काठमाडौं । अब सिम कार्डबिना आफ्नो फोनमा सजिलैसँग उच्च गतिको इन्टरनेट प्रयोग गर्न सकिने भएको छ । यो आईफोनमा सम्भव हुनेछ ।

रिपोर्टहरूका अनुसार, एप्पलले अर्को वर्षको आईफोन १८ प्रोमा यस्तै सुविधा प्रदान गर्न सक्ने अड्कलबाजी सुरू भएको छ । जसमा सिम कार्ड वा नेटवर्कबिना इन्टरनेट पहुँच गर्न अनुमति हुनेछ । द इन्फर्मेशनको रिपोर्टअनुसार, एप्पल र स्पेसएक्सबीच सहकार्यका लागि छलफल भइरहेको छ ।

एप्पलको आईफोन १४, आईफोन १५ र आईफोन १६ मा उपग्रह जडान गरिएको छ, तर यसमा हाल इन्टरनेट जोडिएको छैन र सबै देशहरूमा उपलब्ध छैन । रिपोर्टका अनुसार, एप्पलले यो सुविधालाई समर्थन गर्न आईफोन १८ प्रो हार्डवेयर अपग्रेड गर्न सक्ने बताइएको छ । त्यसपछि आईफोन १८ प्रोले प्रत्यक्ष उपग्रह ५ जी कनेक्टिभिटी गर्न सक्ने बताइएको छ ।

यो सुविधा उपग्रह जडान सुविधाजस्तै एसओएस सुविधा मात्र हुने छैन भनिएको छ । प्रयोगकर्ताहरूले यसलाई सामान्य रूपमा पनि प्रयोग गर्न सक्नेछन् । यसको अर्थ इन्टरनेट पहुँच गर्न सिम कार्ड वा टावरको आवश्यकता नपर्ने हुन सक्ने दाबी गरिएको छ ।

स्पेसएक्सले एप्पलको उपग्रह प्रविधिको रेडियो स्पेक्ट्रम प्रयोग गर्ने स्टारलिङ्क उपग्रहहरूको नयाँ पुस्ता विकास गरेको छ । यसले दुवै कम्पनीहरूका लागि प्राविधिक रूपमा साझेदारीलाई सजिलो बनाउनेछ । यदि यो सम्झौतालाई अन्तिम रूप दिइयो भने हाल सेल टावर नभएका क्षेत्रहरूमा पनि इन्टरनेट पहुँच गर्न सम्भव हुनेछ । एप्पलले आफ्नो प्रो मोडेलहरूमा मात्र यो सुविधा प्रदान गर्न सक्ने बताइएको छ ।

हाल एप्पलमा उपग्रह जडानका लागि यसको उपग्रह साझेदार ग्लोबलस्टारमा निर्भर गर्दछ । रिपोर्टहरूअनुसार, ग्लोबलस्टार चाँडै बेचिनेछ र यसको मूल्य लगभग १० बिलियन डलर हुन सक्छ । यदि यसो भयो भने एप्पललाई नयाँ साझेदारको आवश्यकता पर्नेछ । यस्तो अवस्थामा स्पेसएक् भन्दा राम्रो विकल्प हुन सक्ने बताइएको छ ।